गोल्ड गरिमाच्या नावे फसवणूक

नागपूर : गोल्ड गरिमा योजनेंतर्गत गुंतवणूक केल्यास दामदुप्पट पैसे मिळण्याचे आमिष दाखवून प्रकाश शंकरराव सर्पे (वय ४६, रा. न्यू सुभेदार लेआउट) यांची ३ लाख ५५ हजार रुपयांनी फसवणूक करण्यात आली. याप्रकरणी धंतोली पोलिसांनी दाम्पत्याविरुद्ध फसवणुकीचा गुन्हा दाखल केला आहे. अमरचंद नायक (वय ४०) व दीपाली अमरचंद नायक (वय ३५) अशी गुन्हा दाखल करण्यात आलेल्या दाम्पत्याचे नाव आहे. नायक दाम्पत्याने आणखीही काही गुंतवणूकदारांची फसवणूक केल्याची माहिती समोर आली आहे. या दाम्पत्याविरुद्ध फसवणुकीचे तीन गुन्हे दाखल आहेत. प्रकाश सर्पे हे वितरक आहेत, तर नायक दाम्पत्य सराफा आहेत. दोघांनी प्रकाश यांना गोल्ड गरिमा योजनेंतर्गत अधिक पैसे मिळण्याचे आमिष दाखविले. सप्टेंबर २०१२मध्ये प्रकाश सर्पे यांनी या योजनेत तीन लाख ५५ हजार रुपये गुंतविले. योजनेचा तीन वर्षांचा कालावधी पूर्ण झाल्यानंतर सर्पे यांनी पैसे परत मागितले. दोघांनी पैसे देण्यास टाळाटाळ केली. त्रस्त होऊन अखेर प्रकाश सर्पे यांनी धंतोली पोलिसांत तक्रार केली. पोलिसांनी फसवणुकीचा गुन्हा दाखल केला.