म.टा.विशेष प्रतिनिधी, नागपूर
राष्ट्रसंत तुकडोजी महाराज नागपूर विद्यापीठाने पदव्युत्तर विभागांमधील शिक्षकांचा अनुशेष कंत्राटी नियुक्तीने भरून काढण्याचा निर्णय घेतला आहे. त्यासंदर्भात व्यवस्थापन परिषदेच्या बैठकीत निर्णय घेण्यात आला असून आज, सोमवारपासून भरतीप्रक्रिया सुरू करण्याची शक्यता आहे.
कुलगुरू डॉ. सिद्धार्थविनायक काणे यांनी गेल्यावर्षीच विद्यापीठाच्या पदव्युत्तर विभागांमध्ये कंत्राटी शिक्षक नियुक्त करण्याबाबत निर्णय घेतला होता. परंतु, त्यावेळी विद्यापीठात नियमित प्राधिकारणी स्थापन झालेल्या नव्हत्या. सदर निर्णयामुळे विद्यापीठाच्या सर्वसाधरण निधीवर भार पडणार आहे. त्यामुळे व्यवस्थापन परिषद स्थापन होण्याची प्रतीक्षा करण्यात आली. त्यानुसार आता व्यवस्थापन परिषद स्थापित झाल्याने शैक्षिणक सत्राच्या प्रारंभीच कंत्राटी शिक्षक नियुक्त करण्याच्या निर्णयावर शिक्कामोर्तब करण्यात आले आहे.
सदर निर्णयानुसार २५ हजार रुपयांच्या एकत्रित वेतनावर दहा महिन्यांच्या कंत्राटावर पात्रताधारक शिक्षक नियुक्त करण्यात येणार आहे. त्यासाठी जाहिरात प्रकाशित करण्यात येणार असून प्रत्येक पदाकरिता विद्यापीठ अनुदान आयोगाने निर्धारित केलेले निकष लावण्यात येणार आहेत.
विद्यापीठाकडून पदव्युत्तर विभागनिहाय रिक्त पदांची जाहिरात प्रसिद्ध होणार आहे. त्या पदांना सहायक प्राध्यापक पदाचा दर्जा राहणार आहे. तसेच अर्ज करणाऱ्या उमेदवारांची निवड समितीमार्फत मुलाखत घेण्यात येणार आहे. ही प्रक्रिया सुरू करण्यासाठी विद्यापीठाला एक महिन्याचा विलंब झाला आहे. शैक्षिणक सत्र सुरू होण्यापूर्वीच निवड प्रक्रिया सुरू झाली असती तर ऑगस्टच्या पहिल्याच आठवड्यात कंत्राटी शिक्षक उपलब्ध झाले असते. परंतु, आता प्रक्रीया सुरू केल्यानंतर सप्टेंबरपर्यंत प्राध्यापक निवड पूर्ण होण्याची शक्यता आहे.