मटा इम्पॅक्टचा लोगो व कात्रण सोबत जोडले आहे.
खंडणीविरोधी पथकाची स्थापना
म. टा. प्रतिनिधी, नागपूर
पोलिस आयुक्त डॉ. भूषणकुमार उपाध्याय यांनी खंडणीविरोधी पथकाची स्थापना केली आहे. या पथकात पोलिस निरीक्षक, सहाय्यक पोलिस निरीक्षकासह सात कर्मचाऱ्यांचा समावेश आहे. या पथकाच्या स्थापनेमुळे गुन्हे शाखेतील अधिकाऱ्यांकडून गुन्हेगारांविरुद्ध होत असलेल्या कारवाईला अधिक गती मिळेल, असा विश्वास व्यक्त होत आहे. 'गुन्हे शाखा की डम्पिंग यार्ड?, सात अधिकाऱ्यांना महत्त्वाची कामेच नाहीत, नेमणुकीवर प्रश्न' या आशयाचे वृत्त 'मटा'ने २२ फेब्रुवारीला प्रकाशित केले. या वृत्ताची दखल घेत मंगळवारी खंडणीविरोधी पथकाची स्थापना करण्यात आली.
या पथकाचे कार्यक्षेत्र संपूर्ण पोलिस आयुक्तालयातील ३३ पोलिस स्टेशन असणार आहे. खंडणीविरोधी पथकात पोलिस निरीक्षक भारत क्षीरसागर, सहाय्यक पोलिस निरीक्षक ईश्वर जगदाळे व सात कर्मचाऱ्यांचा समावेश आहे. नागपूरचा झपाट्याने विकास होत असून, बाजारपेठाही वाढत आहेत. अल्पवधीत पैसे मिळविण्यासाठी व्यापाऱ्यांना धमकावून खंडणी उकळण्याचे प्रमाण वाढण्याची शक्यता आहे. यातून हत्या, हत्येचा प्रयत्न यासारखे गंभीर गुन्हे घडू शकतात. ही शक्यता लक्षात घेता पोलिस आयुक्त व सहपोलिस आयुक्त रवींद्र कदम यांनी खंडणीविरोधी पथकाची स्थापना केली. या पथकाचे कामकाज गिट्टीखदानमधील गुन्हेशाखा कार्यालयातून चालणार असून पथकावर गुन्हेशाखेचे अतिरिक्त पोलिस आयुक्त नीलेश भरणे व उपायुक्त गजानन राजमाने यांचे नियंत्रण असेल. व्यापारी, फळभाजी विक्रेते तसेच नागरिकांना कुणी खंडणीसाठी धमकावित असेल तर त्यांनी खंडणीविरोधी पथकाशी संपर्क साधावा, असे आवाहन पोलिसांनी केले आहे.