म. टा. प्रतिनिधी, नागपूर
मौद्यातील वडोदा गावात सुरू असलेल्या क्रिकेट सट्टा अड्ड्यावर स्थानिक गुन्हेशाखा पोलिसांनी छापा टाकला आणि सट्टेबाजाला अटक केली. संजय सुरेश आगेसर (वय २८, रा. छाप्रूनगर, लकडगंज), असे अटकेतील सट्टेबाजाचे नाव आहे. काही महिन्यांपूर्वी संजयने देशमुख यांच्याकडे घर भाड्याने घेतले. या घरात त्याने क्रिकेट सट्ट्याची खायवडी करायला सुरुवात केली.
मंगळवारी भारत न्यूझीलंड संघादरम्यानच्या खेळल्या गेलेल्या क्रिकेट सामन्यावर संजय हा सट्ट्याची खायवडी करीत असल्याची माहिती स्थानिक गुन्हेशाखा पोलिसांना मिळाली. पोलिस अधीक्षक राकेश ओला यांच्या मार्गदर्शनाखाली स्थानिक गुन्हेशाखेचे निरीक्षक अनिल जिट्टावार यांच्या नेतृत्वात पोलिस उपनिरीक्षक सचिन मत्ते, साहायक उपनिरीक्षक लक्ष्मीप्रसाद दुबे, हेडकॉन्स्टेबल सूरज परमार, शिपाई शैलेश, प्रणय, वीरेंद्र व सत्यशील यांनी वडोदा येथे छापा टाकला. पोलिसांनी संजयला अटक केली. त्याच्याकडून ४३ मोबाइल, एलसीडी, लॅपटॉप व सेट टॉप बॉक्स आदींसह १ लाख ६९ हजार रुपये किमतीचे साहित्य जप्त केले. संजयविरुद्ध मौदा पोलिस स्टेशनमध्ये महाराष्ट्र जुगार प्रतिबंधक कायद्यान्वये गुन्हा दाखल केला आहे. आठ महिन्यांपूर्वी संजयला नागपूर गुन्हेशाखा पोलिसांनीही अटक केली होती.