बासरी, संतूर आणि गायनाचा दिवस

म. टा. प्रतिनिधी, नागपूर
राष्ट्रीय, आंतरराष्ट्रीय स्तरावरील गायक, वादकांच्या तिसऱ्या पिढीतील वयाने युवा असलेल्या पण प्रतिभेने मोठ्या असलेल्या कलाकारांनी गुणीजान संगीत समारोहाचे दोन्ही दिवस गाजवले. समारोहाचा दुसरा दिवस गायन, बासरी वादन आणि सतार वादनाने चांगलाच गाजला.

महाराष्ट्र ललित कला निधी आणिा सप्तकच्यावतीने दोनदिवसीय गुणिजान संगीत समारोहाचे कविकुलगुरू कालिदास ऑडिटोरियम येथे आयोजन करण्यात आले होते. समारोहाचा पहिला दिवस पं. भीमसेन जोशी यांचे नातू व पं. श्रीनिवास जोशी यांचे शिष्य विराज जोशी तसेच, पं. शशांक कट्टी याचे शिष्य चिराग कट्टी या युवा कलावंतांनी गाजवल्यानंतर रविवारचे पहिल्या सत्रात उस्ताद रशीद खान यांचे शिष्य नागेशा आडेगावकर यांनी गायनाला राग बिलासखानी तोडीने सुरुवात केली. त्यानंतर तीनतालात निबद्ध राग देशकार सादर केला. या रागात निबद्ध बंदीश ‘जा जा रे जा’ ही सादर केली. गायनाचा शेवट त्यांनी ‘का करू सजनी आये ना बालम’ या ठुमरीने केला. त्यानंतर पं. शिवकुमार शर्मा यांच्या शिष्या श्रुती अधिकारी यांचे संतूरवादन झाले. त्यांनी राग अहिरभैरव सादर केला. त्यात त्यांनी आलाप, जोड, झाला, विलंबित रूपक ताल आणि तीन ताल सादर केले. सायंकाळच्या सत्रात एस. आकाश यांचे बासरीवादन झाले. त्यांना मुकुंदराज देव यांनी तबल्यावर साथ दिली. राग शिवरंजनीने एस. आकाश या युवा बासरीवादकाने वादनाला सुरुवात केली. झपतालात निबद्ध या रागात त्यांनी केलेल्या अप्रतिम वादनाने श्रोते मंत्रमुग्ध झाले. शेवटी तबला आणि बासरीची अप्रतिम जुगलबंदी रंगली. गुणीजान संगीत समारोहाचा समारोप शास्त्रीय गायक आनंद बेंद्रे यांच्या गायकीने झाला. कार्यक्रमाचे सूत्रसंचालन रेणुका देशकर यांनी केले.