नागपूर : नागपूर रेल्वेस्थानकावर आलेल्या इलेक्शन स्पेशलच्या प्रवाशांना उलटी आणि अतिसाराची लागण झाली. जवळपास ३५ प्रवासी आजारी पडल्याने रेल्वे कर्मचाऱ्यांची धावपळ उडाली. रेल्वे डॉक्टरांनी वेळीच धाव घेत त्यांच्यावर उपचार केले. यावेळी स्टेशन उपव्यवस्थापक आणि रेल्वे कर्मचाऱ्यांची बरीच मदत झाली. तासाभरानंतर ही गाडी पुढील प्रवासाला निघाली. हा प्रकार बुधवारी सकाळी घडला.
००७९५ इलेक्शन स्पेशल गाडी तरणतारण, पंजाब येथून निघाली. ही गाडी केरळला जात होती. लांब पल्ल्याचा प्रवास असल्यानंतरही या गाडीला पेंट्रीकार नव्हती. त्यामुळे जेवण आणि पाण्यासाठी प्रवाशांची चांगलीच फजिती झाली. ठिकठिकाणचे पाणी आणि जेवण घेतल्यामुळे काही प्रवाशांना मध्यरात्रीपासून उलट्या आणि अतिसाराचा त्रास सुरू झाला. सकाळी ११.१८ वाजताच्या सुमारास नागपूर रेल्वेस्थानकाच्या फलाट क्रमांक दोनवर गाडी आली. या घटनेची माहिती उपस्टेशन व्यवस्थापकांना देण्यात आली. अतुल श्रीवास्तव यांनी लगेच रेल्वे डॉक्टरांना सूचना दिली. तत्पूर्वी श्रीवास्तव आणि इतर कर्मचारी फलाट क्रमांक दोनवर पोहोचले. रेल्वे डॉक्टर आणि परिचारिका औषधासह फलाट क्रमांक दोनवर गेले. आजारी असलेल्या प्रवाशांना तपासून त्यांच्यावर औषधोपचार करण्यात आले. जवळपास ३५ प्रवाशांवर उपचार केल्यानंतर दुपारी १२.३० वाजताच्या सुमारास गाडी पुढील प्रवासाला निघाली.