गुंतवणुकीचा चांगला पर्याय म्हणून ग्राहकांची पसंती
म.टा. प्रतिनिधी, नागपूर
डिजिटल भारतामध्ये सोनेखरेदीनेही आधुनिक रूप धारण केले आहे. सोने जवळ बाळगण्याचा धोका पत्करण्यापेक्षा सोन्याची 'डिजिटल' खरेदी लाभदायक ठरत आहे. कपडे, गॅजेट्स, इत्यादीच्या 'ऑनलाइन शॉपिंग'सोबत सोन्याची खरेदीही डिजिटल करता येणे शक्य झाले असून, नागपूरसह संपूर्ण राज्यभरात डिजिटल सोने खरेदी करणाऱ्या खातेधारकांची संख्या वाढत आहे.
सध्या ईटीएफ गोल्ड, ई-गोल्ड, गोल्ड फंड, इक्विटी आधारित गोल्ड फंड, सोव्हरीन गोल्ड बाँड्स, पेटीएम डिजिटल गोल्ड हे प्रकार जोरात सुरू आहेत. भारतीयांना सोन्याचे आकर्षण पूर्वीपासून राहिले आहे. भविष्यातील तरतूद म्हणून सोनेखरेदी केली जाते. गुंतवणुकीचा एक चांगला पर्याय म्हणूनही सोन्याची खरेदी होत असते. यामध्ये डिजिटल सोनेखरेदीची आता भर पडली आहे. सोने खरेदीचे हे आधुनिक स्वरूप सध्या बरेच गाजत आहे. एका सर्वेक्षणानुसार, डीमॅट खातेधारकांपेक्षा डिजिटल गोल्ड अकाउंट असणाऱ्यांची संख्या वाढत आहे. सोने स्वत: जवळ ठेवण्याचा धोका नको, म्हणून ते बँकेच्या लॉकरमध्ये ठेवण्यात येते. बरेचदा वर्षानुवर्षे सोने तसेच पडून असते. त्यामुळे डिजिटल सोनेखरेदी अनेकांना आकर्षित करत आहे. विशेषत: मेट्रो शहरांमध्ये या प्रकारच्या सोने खरेदीचा उत्साह दिसून येत आहे.
भिशीचा पर्याय परवडणारा
आधुनिक आणि पारंपरिक पर्यायांचा संगम असणाऱ्या विविध 'भिशी योजना' अनेक ज्वेलर्समार्फत राबवण्यात येतात. अगदी नामांकित ज्वेलर्सच्या दुकानांमध्येही भिशी योजना राबवली जाते. या योजनेमध्ये कमीतकमी ५०० रुपये प्रतिमाहपासून पुढे कितीही रकमेचा पर्याय उपलब्ध असतो. साधारणतः भिशी एका वर्षाकरिता असते. यामध्ये ११ महिन्यांचे पैसे ग्राहकाकडून घेऊन उर्वरित एका महिन्याचे पैसे ज्वेलरमार्फत भरले जातात. जमा रकमेएवढे दागिने, गोल्ड बार अथवा सोन्याची नाणी खरेदी करता येतात. काही मोठ्या ज्वेलर्सनी ऑनलाइन भिशी योजनाही सुरू केली आहे. तसेच महिन्याला ठराविक रकम भरण्याऐवजी सुरवातीला निश्चित रक्कम भरून (साधारणतः ही रक्कम शंभर रुपये किंवा त्यापेक्षा जास्त असते) नंतर कितीही रक्कम भरून सुरू ठेवता येणारी भिशी योजनाही अनेक जेवलर्सनी सुरू केली आहे. प्रत्येक योजनेचे नियम, अटी व लाभ हे वेगवेगळे आहेत.
गुंतवणूक म्हणून पूर्वीपासून सोनेखरेदी करण्यात येत आहे. त्यामध्ये डिजिटल सोने खरेदीचा पर्याय नव्याने उपलब्ध झाला आहे. पण, त्यामुळे पारंपरिक पद्धतीने होणारी सोने खरेदी थांबलेली नाही. ग्राहक प्रत्यक्ष सोने खरेदीचादेखील आनंद लुटत आहेत आणि डिजिटल मार्गाचा स्वीकारही करीत आहेत.
-राजेश रोकडे, सराफा व्यापारी