नक्षलवाद्यांच्या भागात आरोग्य संचालक, डोंगरदऱ्यातून पोहचले बिनागुंडाला

म. टा. वृत्तसेवा, गडचिरोली : जिल्ह्यातील बिनागुंडा हा माओवाद्यांचा सक्रिय वावर असलेला सर्वाधिक मागास भाग आहे. तेथे जायला रस्ता नाही, गावात वीज नाही. रुग्णवाहिका पोहचू शकत नसल्याने खाटेवरून रुग्णांना रुग्णालयात आणले जाते. अशा गावात राज्याच्या आरोग्य खात्याचे वरिष्ठ अधिकारी बुधवारी तब्बल तीन किलोमीटर डोंगरदऱ्यातून पायी प्रवास करून पोहोचले. त्यांना पाहून गावकऱ्यांना आश्चर्याचा सुखद धक्काच बसला.

भामरागड तालुक्यातील बिनागुंडा डोंगराळ प्रदेश असून माओवाद्यांची राजधानी अबुजमाडचे प्रवेशद्वार अशी या भागाची ओळख आहे. अशा या भागात राज्याच्या आरोग्य खात्याच्या संचालक अर्चना पाटील आणि आरोग्य विभागाचे अतिरिक्त आयुक्त डॉ. सतीश पवार हे आरोग्य अधिकाऱ्यांना घेऊन थेट पायी पोहचले. दोन्ही अधिकारी लाहेरीहून गुंडेनुरला गाडीने पोहोचले. तेथून डोंगर चढत जंगलातून वाट काढत पायी प्रवास करुन त्यांनी या भागातील परिस्थिती अनुभवली. बिनागुंडा परिसरातील आदिवासी नागरिकांशी संवाद साधला. त्या ठिकाणी परिचारिका नागरिकांना कशी सेवा देतात. गर्भवती महिलांच्या उपचारासाठी काय करता येईल, त्यांना आरोग्यसेवेसह आहार योग्य मिळतो का, या बाबी अधिकाऱ्यांनी जाणून घेतल्या. आरोग्याच्या जास्तीत जास्त सोयी या भागात पुरवण्याचे निर्देश त्यांनी आरोग्य अधिकाऱ्यांना दिले. या दौऱ्यात जिल्हा शल्यचिकित्सक डॉ. अनिल रुडे, जिल्हा आरोग्य अधिकारी डॉ. दावल साळवे उपस्थित होते.