म. टा. प्रतिनिधी, नागपूर
शासकीय वैद्यकीय महाविद्यालय व रुग्णालयात अपघाती रुग्णांचे निदान करण्यासाठी कोट्यवधी रुपये खर्चून मेडिकलला एमआरआय निदान उपकरण दिले होते. त्याचे वय आता जवळजवळ संपुष्टात आले आहे. त्यामुळे हे उपकरण लवकरच कालबाह्य होणार आहे. असे असतानाही खनिकर्म विभागाने १५ कोटी रुपयांचा निधी देऊ केला. असे असतानाही तो अद्याप मंत्रालयाने खात्यात वळती न केल्याने येथील चाचण्यांना खीळ बसणार आहे. यावरून वैद्यकीय शिक्षण व संशोधन विभागाच्या संचालकांनी शुक्रवारी अधिकाऱ्यांचा क्लास घेत तातडीने प्रस्ताव पाठविण्याच्या सूचना केल्या.
नेत्ररोगतज्ज्ञांच्या परिषदेसाठी वैद्यकीय शिक्षण विभागाचे संचालक डॉ. तात्याराव लहाने हे शुक्रवारी नागपूर भेटीवर आले होते. या निमित्त त्यांनी सकाळी मेडिकल आणि मेयोला भेट देऊन विविध योजनांचा पाठपुरावा केला. मेडिकलमधील कॉलेज कौन्सिलच्या बैठकीत डॉ. लहाने यांनी अधिकाऱ्यांशी चर्चा केली. गेल्यावेळी मेडिकलला दिलेल्या अकस्मात भेटीच्यावेळी डॉ. लहाने यांनी येथील रेडिऑलॉजी विभागाची पाहणी केली होती. त्यावेळी रुग्णांची प्रतीक्षा यादी मोठी असल्याचे त्यांच्या निदर्शनास आले होते. त्यावरून विभागप्रमुखांना खडे बोल सुनावत त्यांनी एमआरआयच्या निदानाचा टक्का वाढविण्याची सूचना केली होती. त्यामुळे या बैठकीत त्यांनी याचाही आढावा घेतला.
सूत्रांकडून मिळालेल्या माहितीनुसार, मेडिकलमध्ये एमआरआय उपकरणासाठी खनिकर्म विभागाने १५ कोटी रुपयांचा निधी देऊ केला आहे. मात्र, मंत्रालयाने तो अद्याप मेडिकलच्या खात्यात वळती केला नाही. त्यामुळे या मुद्यावरून डॉ. लहाने यांनी तासभर चर्चा करून तातडीने प्रस्ताव पाठविण्याच्या सूचनाही अधिष्ठाता डॉ. सजल मित्रा यांना केल्या.
गायनिक आयसीयू आणि सुपरसाठी स्वतंत्र ओपीडी
या घडामोडीत स्त्रीरोग प्रसूतीशास्त्र विभागाला अतिदक्षता विभागाची गरज असल्याची बाब विभागप्रमुख डॉ. फिदवी यांनी संचालक डॉ. लहाने यांच्या निदर्शनास आणून दिली. त्यावर डॉ. लहाने यांनी त्वरित ३० खाटांच्या आयसीयूचा प्रस्ताव सादर करावा. सोबतच ५४ कोटी रुपयांची एमसीएच विंग आणि रुग्णांची गरज लक्षात घेता सुपरमध्ये बाह्यरुग्ण विभागाची स्वतंत्र इमारत बांधकामाचा प्रस्तावही सादर करण्याच्या सूचना यावेळी करण्यात आल्या.
........