म. टा. प्रतिनिधी, नागपूर
नागरिकांना कमी दरात वाहतूक सेवा पुरविताना मनपाला होणारा तोटा ही चिंतेची बाब आहे. तोटा कमी करण्यासाठीही परिवहन समिती उपाययोजना करणार आहे, अशी माहिती परिवहन समिती सभापती जितेंद्र (बंटी) कुकडे यांनी दिली.
मनपा मुख्यालयातील डॉ. पंजाबराव देशमुख स्मृती स्थायी समिती सभागृहामध्ये परिवहन समिती सभापती जितेंद्र (बंटी) कुकडे यांच्या अध्यक्षतेत समितीची बैठक आयोजित करण्यात आली होती. बैठकीत समितीच्या उपसभापती रूपा राय, सदस्य राजेश घोडपागे, नागेश मानकर, सदस्या विशाखा बांते, अर्चना पाठक, वैशाली रोहणकर, रूपाली ठाकुर, मनिषा धावडे, परिवहन व्यवस्थापक तथा उपायुक्त राजेश मोहिते, प्रशासकीय अधिकारी रवींद्र पागे, श्रम अधिकारी अरूण पिपरूडे, तांत्रिक सल्लागार केदार मिश्रा, तांत्रिक व्यवस्थापक सुकीर सोनटक्के, लेखा अधिकारी विनय भारद्वाज, यांत्रिकी अभियंता योगेश लुंगे आदी उपस्थित होते.
नागरिकांनी जास्तीत जास्त प्रमाणात 'आपली बस' सेवेचा लाभ घ्यावा, यासाठी मनपातर्फे सदैव प्रयत्न केले जात आहेत. हे प्रमाण वाढावे यासाठी विविध उपाययोजना करण्याची गरज आहे. मात्र यासोबतच मनपाच्या परिवहन विभागाला होणारा तोटा पाहता तो कमी करण्यासाठीही उपाययोजना करणे आवश्यक आहे. या दोन्हींची योग्य सांगड घालून नागरिकांना कमी दरात दर्जेदार परिवहन सेवा पुरवून मनपाचा तोटा कमी करण्याबाबत लवकरच उपाययोजना करण्यात येईल, असा विश्वास परिवहन समिती सभापती जितेंद्र (बंटी) कुकडे यांनी व्यक्त केला.
मे. साईन पोस्ट (इं) प्रा.लि.द्वारे ग्रुप क्र. ०१ ते ०५ एकूण १५८ बस स्थानकांपैकी मनपाच्या शहर सौंदर्यीकरणांतर्गत सिमेंट रस्ते तथा पावसाळी नाल्या, मेट्रो रेल्वेच्या प्रगतीपथावरील कामांमुळे ६० स्थानके व्यावसायिकदृष्ट्या व लोकोपयोगाकरिता बंद ठेवण्यात आले होते. याबाबत मे. साईन पोस्टद्वारे परिवहन विभागाला वेळोवेळी माहिती देण्यात आली. मे. साईन पोस्टद्वारे २०१८-१९ या वर्षातील ६० बस स्थानकांची रायल्टी कमी करण्याचे निवेदनही विभागाला देण्यात आले आहे. विशेष म्हणजे ६० स्थानके वगळता इतर स्थानकांची रॉयल्टी मे. साईन पोस्टद्वारे भरण्यात आली. ६० बस स्थानकांची रायल्टी कमी करण्याच्या मे. साईन पोस्टच्या या विषयावर गुरूवारी (ता.१४) बैठकीत चर्चा करण्यात आली. यासंदर्भात मे. साईन पोस्टचा अहवाल मागवून तो अहवाल परिवहन समितीकडे सादर करण्याचे निर्देश परिवहन समिती सभापती जितेंद्र (बंटी) कुकडे यांनी दिले. सादर करण्यात येणा-या अहवालावर महापौर, आयुक्त व सत्ता पक्ष नेते यांच्याशी विचार विनिमय करून पुढील बैठकीत निर्णय घेण्यात येणार असल्याचे सभापती कुकडे यांनी सांगितले.