-आरोपी ताब्यात; जळगाव जामोद तालुक्यातील घटनेने खळबळ
म.टा. वृत्तसेवा, बुलडाणा
जळगाव जामोद तालुक्यातील खेर्डा येथे ५० वर्षीय दिव्यांग महिलेची धारदार शस्त्राने हत्या करण्यात आली असून तिचा मृतदेह विवस्त्र अवस्थेत आढळल्याने प्रथमदर्शनी बलात्काराचा प्रकार असल्याचे समोर आले आहे. ही घटना शुक्रवारी मध्यरात्रीनंतर घडली. या प्रकरणी पोलिसांनी गुन्हा दाखल करीत एका आरोपीला ताब्यात घेतले आहे. या घटनेमुळे नागरिकांत संतापाचे वातावरण असून पोलिस या घटनेचा कसून तपास करीत आहेत. हैदराबाद येथील डॉक्टर तरुणीवर बलात्कार करून तिला जिवंत जाळल्याची, तसेच उन्नाव येथील सामूहिक बलात्काराच्या घटनेच्या पार्श्वभूमीवरील या घटनेमुळे नागरिकांत संतापाचे वातावरण आहे.
जळगाव जामोद तालुक्यातील खेर्डा येथील अविवाहीत असलेली ५० वर्षीय दिव्यांग महिला शुक्रवारी रात्री आपल्या घरात झोपली होती. दरम्यान मध्यरात्रीच्या सुमारास घरात घुसून तिच्यावर बलात्कार करण्यात आला. तसेच नंतर तिच्या पोटावर वार करीत तिची हत्या करण्यात आली. तिचा मृतदेह विवस्त्र अवस्थेत पडून होता. शुक्रवारी सकाळी आठ वाजताच्या सुमारास या थरारक घटनेसंदर्भात माहिती मिळताच गावात एकच खळबळ उडाली. या घटनेसंदर्भात माहिती मिळताच जळगाव जामोद पोलिसांनी घटनास्थळी धाव घेत तपास सुरू करीत याप्रकरणी कलम ३७६ व ३०२ अन्वये गुन्हा दाखल केला आहे.
ठाणेदार जाधव यांनी दिलेल्या माहितीनुसार, पोलिसांनी तपासाची चक्रे फिरवीत या प्रकरणी एका आरोपीला ताब्यात घेतले असून संजय उर्फ रितेश देशमुख असे ताब्यात घेतलेल्या आरोपीचे नाव आहे. ताब्यातील आरोपीने गुन्ह्याची कबुली दिल्याची माहिती आहे. या प्रकरणात पोलिसांनी तपासासाठी श्वान पथकाची मदत घेतली होती. जिल्हा पोलिस अधीक्षक दिलीप पाटील भुजबळ यांच्यासह वरिष्ठ अधिकाऱ्यांनी घटनास्थळी भेट देत तपासाबाबत सुचना केल्या होत्या. हत्या झालेल्या महिलेच्या घराशेजारीच ताब्यात घेण्यात आलेल्या आरोपीचे घर आहे. देशभरात हैदराबाद येथील घटना तसेच उन्नाव येथील घटना ताजी असतानाच बुलडाणा जिल्ह्यातील या घटनेने संताप व्यक्त केला जात आहे.