तपासण्यासाठी नको दोनशेपेक्षा जास्त पेपर्स

म.टा.प्रतिनिधी, नागपूर

दहावी आणि बारावीच्या परीक्षेचे पेपर्स तपासणाऱ्या परीक्षकांना २०० आणि समीक्षकांना १४०० पेक्षा जास्त पेपर्स देण्यात येऊ नयेत, अशी मागणी शिक्षक भारती संघटनेने केली आहे. या परीक्षेशी संबंधित विविध विषयांवर संघटनेच्या वतीने नागपूर बोर्डाचे प्रभारी सचिव श्रीराम चव्हाण यांना नुकतेच निवेदन देण्यात आले.

या दोन्ही परीक्षांशी विविध प्रश्न यावेळी शिक्षक भारतीच्या वतीने उपस्थित करण्यात आले. बारावीच्या परीक्षेसाठी आर्टस आणि कॉमर्सच्या परीक्षकांना दोन विषयांचे परीक्षणाचे काम दिले जाते. त्या ऐवजी या परीक्षकांना एकाच विषयाचे काम देण्यात यावे. पर्यावरण विषयाच्या बाह्य परीक्षणासाठी गेलेल्या शिक्षकांना मानधन दिले जात नाही. ते मानधन देण्यात यावे, अशी मागणी संघटनेने केली आहे.

फेब्रुवारी आणि मार्च महिन्यात दहावी आणि बारावीच्या परीक्षा होत आहेत. या परीक्षेसाठी नागपुरातील विद्यार्थ्यांना त्यांच्या शाळेपासून एक किलोमीटरपेक्षा जास्त अंतरावरील परीक्षा केंद्र देण्यात येऊ नये. परीक्षेच्या वेळेत केंद्रावर न पोहोचणाऱ्या विद्यार्थ्यांना यंदाच्या सत्रापासून प्रवेश देणार नसल्याचा निर्णय शासनाने जाहीर केला आहे. मात्र, नागपूर शहरात अनेक ठिकाणी रस्त्यांची कामे सुरू आहेत. त्यामुळे, विद्यार्थ्यांना परीक्षेला पोहोचण्यास उशीर होऊ शकतो. अशा परिस्थितीत उशीर झालेल्या विद्यार्थ्यांना परीक्षेला प्रवेश दिला जावा, अशी मागणीही शिक्षक भारतीने केली आहे.

चव्हाण यांना निवेदन देताना संघटनेचे विभागीय कार्यवाह दिलीप तडस, शहर अध्यक्ष सपन नेहरोत्रा, सचिव दीपक नागपुरे, देवीदास नंदेश्वर, लक्ष्मीकांत बावनकर यांनी केली आहे.