नागपूर : उपराजधानीत खळबळ उडविणाऱ्या दुहेरी हत्याकांडप्रकरणात अटकेतील अंकित शाहू याची न्यायालयाने ३ एप्रिलपर्यंत पोलिस कोठडीत रवानगी केली. याप्रकरणात आतापर्यंत सूत्रधार गणेश शाहू, त्याची पत्नी गुडियाला अटक करण्यात आली आहे. एक अल्पवयीन आरोपीलाही याप्रकरणात ताब्यात घेण्यात आले होते. फेब्रुवारी महिन्यात गणेश शाहू व त्याच्या नातेवाइकांनी पत्रकार रविकांत कांबळे यांच्या आई उषा कांबळे व मुलगी राशीची निर्घृण हत्या केली होती. सुरुवातीला पोलिसांनी गणेश व गुडियाला अटक केली. चौकशीदरम्यान पोलिसांनी गणेश याचा भाऊ अंकितला अटक केली. त्याची पोलिस कोठडी संपल्याने शनिवारी तपास अधिकारी व सहायक पोलिस आयुक्त राजरत्न बन्सोड यांनी अंकित याला न्यायालयात हजर केले. अंकित याच्या माहितीवरून दागिने व पेट्रोलची डबकी जप्त करण्यात आली आहे. याप्रकरणात आणखी आरोपी असण्याची शक्यता असून, अंकितची सखोल चौकशी करायची आहे. हे हत्याकांड नरबळी असल्याचा संशय आहे. त्यादिशेने तपास करायचा असल्याने अंकित याची पोलिस कोठडी देण्याची विनंती पोलिसांनी न्यायालयाला केली. युक्तिवादानंतर न्यायालयाने अंकितची तीन दिवसांसाठी पोलिस कोठडीत रवानगी केली.
दुहेरी हत्याकांड, अंकितला पीसीआर
उपराजधानीत खळबळ उडविणाऱ्या दुहेरी हत्याकांडप्रकरणात अटकेतील अंकित शाहू याची न्यायालयाने ३ एप्रिलपर्यंत पोलिस कोठडीत रवानगी केली...
Maharashtra Times 1 Apr 2018, 5:00 am