रणजित पाटील यांची माहिती
म.टा.प्रतिनिधी, नागपूर
महापालिकेच्या मराठी शाळांमधील पटसंख्या कमी होत आहे, ही वस्तुस्थिती आहे. त्यामुळे पूर्वी महापालिकेच्या शाळांसाठी असलेली शिक्षण समिती नियुक्त करून त्याद्वारे या समस्येवर तोडगा काढता येईल का, यासंबंधी शिक्षण विभागाची मदत घेऊन त्यादृष्टीने महापालिकेच्या मराठी शाळांसाठी धोरण तयार करण्यासंबंधी सरकार सकारात्मक असल्याचे नगरविकास राज्यमंत्री रणजित पाटील यांनी बुधवारी विधान परिषदेत सांगितले.
नागपूर महापालिकेच्या मराठी शाळांमधील मुलांची पटसंख्या दिवसेंदिवस कमी होत असल्याबद्दल गिरीश व्यास यांनी प्रश्नोत्तराच्या तासात प्रश्न उपस्थित केला. नागपूर महापालिकेच्या आतापर्यंत ३४ मराठी शाळा बंद झाल्या असून, या शाळा ज्या इमारतीत होत्या, त्यांचा आता कशासाठी वापर सुरू आहे, याची माहिती सरकारने द्यावी, अशी मागणी त्यांनी केली. यावर, 'महापालिकेच्या मराठी शाळांची पटसंख्या कमी होत आहे, ही केवळ नागपुरातीलच समस्या नाही, तर राज्यातील महापालिकेच्या मराठी शाळांचा प्रश्न आहे. त्यामुळे मराठी शाळांचा दर्जा सुधारण्याबरोबर त्यातील पटसंख्या वाढवण्यासाठी प्रयत्न करणार आहोत. यासाठी स्वयंसेवी संस्थांची मदत घेऊ', असे पाटील यांनी सांगितले.
'महापालिकेच्या शाळांसाठी शिक्षक उपलब्ध होत नाहीत. त्यामुळे शाळांचा दर्जा खालावत आहे', याकडे राष्ट्रवादीचे हेमंत टकले यांनी लक्ष वेधले. त्याचबरोबर पूर्वी महापालिका शाळांसाठी शिक्षण समिती होती, त्याचे पुनर्गठन करावे, अशी सूचनाही केली. त्यावर पाटील यांनी शिक्षण विभागाशी चर्चा करून या समितीचे पुनर्गठन करीत महापालिकेच्या मराठी शाळांचा दर्जा सुधारण्यासाठी काय उपाययोजना करता येतील, यादृष्टीने प्रयत्न करू, असेही पाटील यांनी सांगितले.
महापालिका शाळांना मिळणारे अनुदान त्यांच्या खात्यात ऑनलाइन जमा करावे, अशी मागणी अनिल भोसले यांनी केली. शिक्षण विभागाशी यासंदर्भात चर्चा करून त्यासंबंधीचा निर्णय घेण्यात येईल, असेही पाटील यांनी स्पष्ट केले.