विभागीय आयुक्तांची सूचना
नागपूर : शहरातील वाहतूक कोंडी टाळण्यासाठी सर्व यंत्रणांनी समन्वयाने काम करण्याचे निर्देश विभागीय आयुक्त अनुपकुमार यांनी दिले आहेत.
शहर व सभोवतालच्या परिसरातील वाहतूक व पार्किंगच्या प्रश्नांचा अभ्यास करून त्यावर उपाययोजना सुचविण्याबाबत जनहित याचिकेच्या संदर्भात विभागीय आयुक्तांनी आढावा घेतला. यावेळी पोलिस उपायुक्त (वाहतूक) चैतन्य एस. उपायुक्त संजय धिवरे, उपविभागीय अधिकारी शिरीष पांडे, उपायुक्त मनपा नितीन कापडणीस, विभागीय वाहतूक अधिकारी अशोक वाडीभस्मे, सहायक व्यवस्थापक संदीप बापट उपस्थित होते.
शाळा किंवा महाविद्यालयीन विद्यार्थ्यांकडून वाहतूक नियमांचे पालन व्हावे म्हणून जनजागृती करण्यात आली असून, १५६ प्राचार्य व मुख्याध्यापकांकरवी विद्यार्थ्यांना नोटीस देण्यात आल्या आहेत. जानेवारी महिन्यापासून आतापर्यंत ७८ अल्पवयीन वाहनचालकांविरुद्ध विशेष मोहिमेंतर्गत कारवाई करण्यात आली असल्याची माहिती यावेळी रस्ता सुरक्षा दलाने दिली.
सीताबर्डी येथील वाहतूक कोंडी तथा पार्किंग संबंधाने यापूर्वी प्रायोगिक तत्त्वावर कार्यवाही करण्यात आलेली होती. त्यावर आता महानगरपालिकेच्या स्तरावरून पार्किंग धोरण निश्चित झाल्यानंतरच यासंबंधाने कार्यवाही निश्चित करण्यात यावी, असे निर्देश आयुक्तांनी दिले. महानगरपालिका हद्दीतील बांधकाम विभागाच्या अखत्यारीतील रस्त्यांच्या परिस्थिती व नवीन बांधण्यात येणारे रोड रंम्बलर, स्पिड ब्रेकर याबाबतही सादरीकरण करण्याचे निर्देश यावेळी आयुक्तांनी दिले.