प्रवेशप्रक्रियेला नव्याने प्रारंभ; विद्यार्थ्यांची नोंदणी सुरळीत
म.टा.प्रतिनिधी, नागपूर
मागील आठवड्यात झालेल्या मोठ्या गोंधळानंतर अखेर सोमवारी इंजिनीअरिंग प्रवेशाची प्रक्रिया रुळावर आली. विविध कॉलेजेसमध्ये विद्यार्थ्यांच्या नोंदणी प्रक्रियेला प्रारंभ झाला असून पहिल्या दिवशी कोणतीही अडचण आली नाही.
इंजिनीअरिंग, फार्मसी, टेक्नॉलॉजी आणि आर्किटेक्चर अभ्यासक्रमांच्या प्रवेशासाठी मागील आठवड्यात प्रक्रिया सुरू करण्यात आली होती. मात्र, सेतू सुविधा केंद्रांवरील अडचणी तसेच सर्व्हर डाउन होणे यांसारख्या अडचणींमुळे पालक, विद्यार्थी आणि कॉलेजेस मेटाकुटीस आले होते. राज्यभरात या प्रक्रियेवर संताप व्यक्त होऊ लागल्यानंतर ही संपूर्ण प्रक्रियाच रद्द करण्यात आली होती. अखेर सोमवारी या प्रक्रियेला नव्याने प्रारंभ करण्यात आला. पूर्वीच्या सेतू सुविधा केंद्रांऐवजी मागील वर्षाप्रमाणे निरनिराळ्या कॉलेजेसमध्ये विद्यार्थ्यांसाठी सुविधा केंद्र सुरू करण्यात आले आहेत. त्यानुसार, सोमवारी अनेक विद्यार्थ्यांनी विविध केंद्रांवर नोंदणी प्रक्रियेला सुरुवात केली. सीईटी सेलने दिलेल्या लिंकवर सोमवारपासून विद्यार्थ्यांनी आपली वैयक्तिक माहिती देण्यास प्रारंभ केला. याशिवाय, आवश्यक ती कागपदत्रेही अपलोड केली. या सर्व गोष्टींची पडताळणी आज, मंगळवारपासून केली जाणार आहे.
मागीलवर्षी प्रवेशांसाठी जी प्रक्रिया राबविण्यात आली त्याचपद्धतीने यंदाही प्रवेश केले जाणार आहेत. रविवारी रात्री राज्याच्या सीईटी सेलने प्रवेशप्रक्रियेसंदर्भात नवी सूचना जाहीर केली आहे. याआधीच्या प्रवेशप्रक्रियेत अडचणी आल्याने तसेच अनेक विद्यार्थ्यांना नोंदणी करता न आल्याने ती प्रक्रिया रद्द करण्यात आली आहे. संपूर्ण नोंदणी आणि प्रवेशप्रक्रिया नव्याने करण्याचा निर्णय प्रवेश नियंत्रण प्राधिकारिणीने घेतला आहे. बी.ई. आणि बी.टेक. अशा दोन्ही चार वर्षांच्या अभ्यासक्रमांसाठी ही प्रक्रिया राबविण्यात येणार आहे. महाराष्ट्रातील विद्यार्थी, इतर राज्यांमधील विद्यार्थी, जम्मू-काश्मिरचे विद्यार्थी आणि अनिवासी भारतीय विद्यार्थी अशा चार गटांमध्ये प्रवेश केले जातील. खुल्या गटातील विद्यार्थ्यांना बारावीत ५० टक्के तर मागास गटातील विद्यार्थ्यांना ४५ टक्के गुण असणे आवश्यक आहे. इंजिनीअरिंग पदविका घेतलेल्या विद्यार्थ्यांसाठीही हेच निकष ठेवण्यात आले आहेत. fe2019.mahacet.org या संकेतस्थळावरून विद्यार्थ्यांना ऑनलाइन नोंदणी करावयाची आहे.
प्रवेशाचे नवे वेळापत्रक
- ऑनलाइन नोंदणी आणि कागपदत्रे अपलोड करणे : २४ ते ३० जून
- कागदपत्रे पडताळणी आणि अर्ज निश्चित करणे : २५ जून ते १ जुलै
- तात्पुरती गुणवत्तायादी : २ जुलै
- तक्रारी दाखल करणे : ३ ते ४ जुलै
- अंतिम गुणवत्तायादी : ५ जुलै
- कॅप पहिली फेरी : ६ जुलै
- कॅप दुसरी फेरी : १६ जुलै
- कॅप तिसरी फेरी : २४ जुलै