अभ्यासासोबतच सगळ्या गोष्टी एन्जॉय
नागपूर : 'आई-वडील दोघेही शिक्षक. मोठी बहीण स्नेहा नागपुरात शासकीय दंतचिकित्सा महाविद्यालयात शिकते. त्यामुळे घरात अभ्यासाचेच वातावरण. मीही अभ्यासासोबत सगळ्याच गोष्टी एन्जॉय केल्या. खेळाच्या वेळेत खेळ, मनोरंजनाच्या वेळेत टाइमपास केला. अभ्यासासोबत सगळ्याच गोष्टी मनासारख्या करता आल्याने कधी ताण वाटलाच नाही', अशा शब्दांत योगेंद्र हुमणे या विद्यार्थ्याने आपल्या यशाचे गमक सांगितले.
डॉ. बाबासाहेब आंबेडकर कॉलेजच्या विज्ञान शाखेत शिकणाऱ्या योगेंद्रने बारावीच्या परीक्षेत ६३४ गुणांसह ९७.५४ टक्के गुण मिळवत घवघवीत यश खेचून आणले. मागासवर्गीय विद्यार्थ्यांच्या गटातून योगेंद्र अव्वल ठरला आहे. या यशामागचे सूत्र उलगडताना तो सांगत होता, 'बाबा गौतम आणि आई शीतल दोघेही भंडारा येथे शिक्षक असल्याने अभ्यासाचे वातावरण घरातच होते. स्नेहाचीही साथ होतीच. कुठलाही प्रश्न अडला तर मी ताईला विचारतो. तीही समजावण्यात कमीपणा मानत नाही. त्यामुळे अभ्यासाचा ताण कधी वाटलाच नाही. मला नुसते पुस्तकी किडा व्हायचे नव्हते. दहावीत असल्यापासून मी हे ठरवले होते. खेळाच्या वेळेत मनसोक्त खेळलो. इतकेच नाही तर गेल्या वर्षभरात मी खूपसारे सिनेमेदेखील पाहिले आहेत. पण, अभ्यासाच्या वेळेत कधीच खंड पडू दिला नाही. ज्या त्या वेळेत ते ते केल्यानेच मनासारखा अभ्यासही करता आला. ताईसारखे मलाही डॉक्टर बनण्याची मनापासून इच्छा आहे. त्यासाठी मी मेडिकलची प्रवेशपरीक्षादेखील दिली आहे. नागपूरच्या मेडिकल कॉलेजमध्ये मला प्रवेश मिळवायचा आहे.'