म. टा. विशेष प्रतिनिधी, नागपूर
नागरिकांना संपत्ती कर भरण्यासाठी सुविधा व्हावी, याकरिता करवसुली अभियानांतर्गत प्रत्येक रविवारी कर विभागाद्वारे निर्धारित वॉर्डनिहाय करवसुली शिबिर घेण्यात येणार आहे. मार्च अखेरपर्यंत दर रविवारी सकाळी १० ते दुपारी २ या वेळेत विविध ठिकाणी हे शिबिर घेण्यात येणार आहेत. यासंबंधी प्रशासनातर्फे आवश्यक कार्यवाही पूर्ण करण्याचे निर्देश करआकारणी व करसंकलन समिती सभापती महेंद्र धनविजय यांनी दिले.
मालमत्ता करवसुलीचा आढावा घेण्यासंदर्भात मंगळवारला करआकारणी व करसंकलन समिती सभापती कक्षात समितीची बैठक झाली. बैठकीत समिती सभापती महेंद्र धनविजय यांच्यासह उपसभापती सुनील अग्रवाल, सदस्या शिल्पा धोटे, उज्ज्वला शर्मा, सहायक आयुक्त मिलिंद मेश्राम, सहायक आयुक्त किरण बागडे, दहाही झोनच्या कर विभागाचे सहायक अधीक्षक उपस्थित होते. संपत्ती कर भरण्याकरिता मनपातर्फे आवाहन केले जाते. मात्र अनेकदा झोन कार्यालयामध्ये नागरिकांना मोठ्या रांगेमध्ये उभे राहावे लागते. मनपाच्या उत्पन्नाचे मुख्य स्रोत संपत्तीकर आहे. त्यामुळे कर भरण्याकरिता नागरिकांना सुविधा उपलब्ध करून देणे आवश्यक आहे. त्यादृष्टीने कर विभागाद्वारे निर्धारित करण्यात आलेल्या वॉर्डमध्ये आता दर रविवारी करवसुली शिबिर आयोजित करण्यात येणार आहे. येत्या १६ फेब्रुवारीपासून मार्च अखेरपर्यंत प्रत्येक रविवारी सकाळी १० ते दुपारी २ वाजतापर्यंत दहाही झोनमधील कर विभागाच्या विविध वॉर्डमध्ये हे शिबिर घेण्यात येणार आहे. यासंबंधी आवश्यक कार्यवाही पूर्ण करून नागरिकांना सुविधा निर्माण करून द्यावे, असे निर्देश धनविजय यांनी दिले. कर विभागासंदर्भात दैनंदिन कर वसुली, लिलावासाठी काढण्यात आलेल्या मालमत्ता, जाहीरनामा आदींची झोननिहाय माहिती दररोज मुख्यालयात सादर करण्याचेही निर्देश सभापतींनी यावेळी दिले.
......