म. टा. प्रतिनिधी, नागपूर
अॅक्वा लाइन म्हणून ओळख असलेल्या मेट्रो रेल्वेच्या हिंगणा मार्गाचे परीक्षण करण्यासाठी १३ डिसेंबर रोजी सीएमआरएसची चमू नागपुरात येत आहे. या मार्गाच्या परीक्षणानंतर मेट्रो सेवा सुरू करण्याचा मार्ग खुला होणार असून, लवकरच या मार्गावरही मेट्रोसेवा प्रवाशांसाठी उपलब्ध करून दिली जाईल, असे महामेट्रोकडून सांगण्यात आले.
मेट्रो रेल्वे सुरक्षा आयुक्त (सीएमआरएस) जनक कुमार गर्ग यांच्या नेतृत्वात चमू झाशी राणी मेट्रो स्टेशनचे परीक्षण करणार आहे. उत्तर अंबाझरी मार्गावरील झासी राणी मेट्रो स्टेशन 'अँक्वा थीम' वर बनविण्यात आले आहे. ५ हजार वर्ग मीटरच्या क्षेत्रामध्ये दोन मजली स्थानाची इमारत बांधण्यात आली आहे. पहिल्या मजल्यावर तिकीट काउंटर, दुकाने, प्रसाधन गृह इत्यादींची व्यवस्था करण्यात आली आहे. स्थानकापर्यंत पोहोचण्याकरिता लिफ्ट आणि एस्केलेटर्सची व्यवस्थादेखील या ठिकाणी करण्यात आली आहे. रेनवॉटर हार्वेस्टिंगचे प्रावधान या ठिकाणी करण्यात आले आहे. वरिष्ठ नागरिक आणि विकलांगाकरिता मेट्रो कोचपर्यंत पोहोचण्याकरिता विशेष व्यवस्था करण्यात आल्याचे महामेट्रोकडून सांगण्यात आले.
लोकार्पण कुणाच्या हस्ते ?
सीताबर्डी ते खापरी या मार्गावर सध्या मेट्रो सेवा सुरू असून दर १५ मिनिटांनी ताशी ८० किमीच्या वेगात मेट्रो धावत आहे. लोकसभा निवडणुकीपूर्वी पंतप्रधान नरेंद्र मोदी यांच्या हस्ते या मार्गाचे लोकार्पण करण्यात आले होते. हिंगणा मार्गही काही महिन्यांपूर्वीच तयार झाला असून लोकार्पणाला मुहूर्त सापडत नसल्याने या मार्गाचे लोकार्पण रखडले आहे. विधानसभा निवडणुकीपूर्वी अतिवृष्टीमुळे पंतप्रधान नरेंद्र मोदी यांचा दौरा रद्द झाल्याने या मार्गाचे लोकार्पण पुढे ढकलण्यात आले होते. पंतप्रधान नरेंद्र मोदी यांच्या हस्तेच लोकार्पण होईल, असा आग्रह धरणारे तत्कालीन मुख्यमंत्री देवेंद्र फडणवीस आता विरोधी पक्षनेते आहेत. त्यामुळे आता या मार्गाचे लोकार्पण मुख्यमंत्री उद्धव ठाकरे यांच्या हस्ते होणार असल्याची चर्चा प्रशासकीय वर्तुळात आहे.