युवक काँग्रेसचा जल्लोष; नगरसेवकांच्या सावध प्रतिक्रिया
म. टा. विशेष प्रतिनिधी,नागपूर
काँग्रेसचे कार्याध्यक्ष नितीन राऊत यांना काँग्रेसने उत्तर नागपुरातून उमेदवारी घोषित करताच, त्यांच्या समर्थकांनी जल्लोष केला. त्यांच्या पक्षांतर्गत विरोधकांनी मात्र सावध प्रतिक्रिया व्यक्त केल्या आहेत. काँग्रेसचे नगरसेवक मनोज सांगोळे यांनी 'आणखी किती प्रतीक्षा करायची', असे म्हणत बंडखोरीचे संकेत दिले आहेत.
उत्तर नागपुरातून निवडून येणारे आणि मंत्रिपद भूषविणारे नितीन राऊत, यांना २०१४ च्या विधानसभा निवडणुकीत मतदार आणि कार्यकर्त्यांच्या नाराजीस सामोरे जावे लागले. परिणामस्वरूप ते तिसऱ्या क्रमांकावर फेकले गेले. भाजप आणि बसपात मुख्य लढत होऊन भाजपला विजय मिळाला. बसपाकडून लढलेले उमेदवार किशोर गजभिये आता काँग्रेसमध्ये आहेत. २०१९च्या लोकसभा निवडणुकीत बसपची शक्ती दिसली नाही. त्यामुळे शहरातील फक्त उत्तर नागपुरात काँग्रेसला आघाडी मिळाली. त्यामुळे राऊत यांच्या विजयाच्या आशा वाढल्या असतानाच, कधीकाळी त्यांचे समर्थक असणारया कार्यकर्त्यांनी दिल्ली गाठून त्यांच्या विरोधात मोर्चेबांधणी केली. त्यांना उमेदवारी देऊ नये, असे बजावले.
कार्यकर्त्यांच्या विरोधानंतर काँग्रेस श्रेष्ठींनी कार्याध्यक्ष असलेल्या राऊत यांच्यावर विश्वास दर्शविला. पहिल्या यादीत त्यांचे नाव जाहीर केले. वृत्त कळताच उत्तर नागपुरातील युवक काँग्रेसच्या कार्यकर्त्यांनी त्यांच्या बेझनबाग घरासमोर जल्लोष केला. काही कार्यकर्त्यांनी यंदा नाराजी बाजूला सारून या मतदारसंघात पुन्हा काँग्रेसला विजयी करण्यासाठी कार्यकर्ते कामाला लागती अशी प्रतिक्रिया व्यक्त केली.
काँग्रेसचे ज्येष्ठ नगरसेवक मनोज सांगोळे यांनी मात्र निवडणूक लढणार असल्याचे जाहीर केले. पहिल्याच दिवशी त्यांनी अर्जही विकत घेतला. 'आणखी किती वेळ प्रतीक्षा करायची', अशी प्रतिक्रिया त्यांनी व्यक्त केली. दुसरे ज्येष्ठ नगरसेवक संदीप सहारे यांनी सावध प्रतिक्रिया देत 'कार्यकर्त्यांची नाराजी दूर केल्याशिवाय मतदारसंघात काँग्रेसचा विजय सोपा नाही', असे मत व्यक्त केले. नगरसेविका भावना लोणारे यांनीही पक्षासाठीच काम करावे लागेल, असे मत व्यक्त केले.
बसप, वंचितकडे लक्ष
बसप, वंचित कुणाला उमेदवारी देते. मतविभाजन कसे होते यावर येथील चित्र अवलंबून असेल. तूर्त दोन्ही पक्षांचा विजयासाठी कस लागणार हे नक्की