म.टा. वृत्तसेवा, वाशीम
जिल्ह्यात २०१९च्या ऑक्टोबर व नोव्हेंबर महिन्यात 'क्यार' व 'महा' या चक्रीवादळामुळे झालेल्या अवकाळी पावसामुळे जिल्ह्यातील शेतपिके व बहुवार्षिक पिकांचे नुकसान झाले. त्यामुळे जिल्ह्यातील ७९३ गावांमध्ये महसूल व वनविभागाच्या १८ नोव्हेंबर २०१९च्या शासन निर्णयानुसार सवलती जाहीर करण्यात आल्या आहेत. जिल्ह्यातील शेतकऱ्यांना जमीन महसुलात सूट व शेतपिकांचे नुकसान झालेल्या शेतकऱ्यांच्या पाल्यांना शाळा व महाविद्यालयीन परीक्षा शुल्कात माफी या दोन सवलती लागू करण्याचे आदेश जिल्हाधिकारी हृषिकेश मोडक यांनी दिले आहेत. वाशीम तालुक्यातील १३१, मालेगाव तालुक्यातील १२२, रिसोड तालुक्यातील १००, मंगरुळपीर तालुक्यातील १३७, कारंजा तालुक्यातील १६७ व मानोरा तालुक्यातील १३६, अशा जिल्ह्यातील ७९३ गावांना या सवलती लागू करण्यात आल्या आहेत.