◼अद्याप अधिकृत घोषणा नाही; पालकांची प्रतीक्षा सुरू
म.टा.प्रतिनिधी, नागपूर
हजारो पालकांच्या जिव्हाळ्याच्या विषय असलेल्या आरटीई प्रवेशप्रक्रियेच्या घोषणेची वाट बघणे सुरू झाले आहे. राज्य शासनाकडून अद्याप याबाबत कोणतीही घोषणा झाली नसताना सोशल मीडियावर मात्र खोटे वेळापत्रक आणि संबंधित माहिती व्हायरल झाली आहे.
आर्थिकदृष्ट्या दुर्बल घटकातील विद्यार्थ्यांसाठी विविध माध्यमांच्या शाळांमध्ये शिक्षण हक्क कायद्यांतर्गत प्रवेश दिले जातात. प्रत्येक शाळेत एकूण संख्येच्या २५ टक्के प्रवेश हे आरटीईअंतर्गत दिले जातात. यासाठी दरवर्षी स्वतंत्रपणे प्रवेशप्रक्रिया राबविण्यात येते. साधारणत: फेब्रुवारी महिन्यात या प्रक्रियेला सुरुवात होते. यंदाच्या प्रवेशप्रक्रियेची वाट बघणे आता सुरू झाले असून पालकांकडून शिक्षण विभागाकडे विचारणा करण्यात येते आहे. दरम्यान, सोशल मीडियावर आरटीई प्रवेशप्रक्रिया सुरू झाल्याबाबतचे संदेश व्हायरल झाले आहेत. 'रविवार, २० जानेवारीपासून आरटीईचे ऑनलाइन अर्ज सुरू होणार असून, २८ फेब्रुवारीपर्यंत पालकांना अर्ज भरता येतील', असे या संदेशांमध्ये नमूद करण्यात आले आहे. मात्र, शिक्षण विभागाकडून याबाबत अद्याप कोणतीही घोषणा झालेली नाही. आरटीई प्रवेशांसाठी शिक्षण विभागाने विशेष संकेतस्थळ तयार केले आहे. प्रवेशाचे सर्व व्यवहार याच संकेतस्थळामार्फत करण्यात येतात. या संकेतस्थळावरही वेळापत्रकाची घोषणा करण्यात आलेली नाही. २०१९-२० या शैक्षणिक सत्रातील आरटीई प्रवेश प्रक्रियेचे वेळापत्रक लवकरच जाहीर करण्यात येईल, असे या संकेतस्थळावर दाखविण्यात येते आहे.
दरम्यान, आरटीई प्रवेशप्रक्रियेचा आढावा घेण्यासाठी शनिवारी व्हिडीओ कॉन्फरन्सिंगचेदेखील आयोजन करण्यात आले होते. विभागीय शिक्षण उपसंचालक, प्राथमिक शिक्षणाधिकारी तसेच महापालिकेतील प्रशासन अधिकारी या बैठकीला उपस्थित होते. नर्सरी, ज्युनियर केजी आणि पहिला वर्ग यांचे प्रवेश या ऑनलाइन प्रक्रियेमार्फत केले जातात. या प्रक्रियेतून प्रवेश घेतलेल्या विद्यार्थ्यांना आठवीपर्यंतचे शिक्षण मोफत देण्यात येते. अनुसूचित जाती-जमातीसाठी उत्पन्नाच्या दाखल्याची गरज नाही तर खुल्या वर्गासाठी वार्षिक उत्पन्न एक लाखाच्या आत असणे आवश्यक आहे.
आरटीई प्रवेशासाठी आवश्यक कागदपत्रे
- आधार कार्ड, पासपोर्ट, निवडणूक ओळखपत्र, वीजबिल, लायसन्स यापैकी एक रहिवासी पुरावा
- पाल्याचा जन्माचा दाखला
- पाल्याचे पासपोर्ट साईज रंगीत फोटो
-पालकाचा जातीचा दाखला(फक्त अनुसूचित जाती-जमातीसाठी)
- एक लाखाच्या आतील उत्पनाचा दाखला (खुली, इतर मागासवर्गीय)
- https://rte25admission.maharashtra.gov.in/adm_portal/Users/rteindex या संकेतस्थळावर प्रवेशअर्ज उपलब्ध होतील.