म. टा. प्रतिनिधी, नागपूर
येत्या विधानसभा निवडणुकीत कोणत्याही एका पक्षाचे समर्थन न करता राजकारणापासून दूर राहण्याचा निर्णय 'सेव्ह मेरिट, सेव्ह नेशन' चळवळीने घेतला आहे. आंदोलनातील सदस्यांनी आपापल्या विवेकबुद्धीनुसार निवडणुकीत निर्णय घ्यावा, असे सांगण्यात आले आहे. खुल्या प्रवर्गातील विद्यार्थ्यांच्या हक्कासाठी सुरू असलेल्या चळवळीच्या 'तटस्थ' भूमिकेचा सर्वाधिक फटका कोणत्या पक्षाला बसणार, याबाबत चर्चेला तोंड फुटले आहे.
महाराष्ट्र राज्यातील अतिरिक्त आरक्षणामुळे खुल्या प्रवर्गातील विद्यार्थ्यांवर अन्याय होत असल्याची टीका करीत 'सेव्ह मेरिट, सेव्ह नेशन'च्या वतीने आंदोलन पुकारण्यात आले आहे. या आंदोलनातील कार्यकर्त्यांची राज्यस्तरीय बैठक नुकतीच नागपुरात पार पडली. 'सेव्ह मेरिट'ची चळवळ महाराष्ट्रातील प्रत्येक तालुक्यात पोहोचविण्याचा संकल्प यावेळी घेण्यात आला. येत्या विधानसभा निवडणुकीत कोणत्याही एका पक्षाच्या पाठीशी उभे न राहता राजकारणापासून दूर राहण्याचा निर्णय यावेळी घेण्यात आला. या आंदोलनाचे अराजकीय स्वरूप कायम ठेवून आंदोलनाच्या सदस्यांनी निवडणुकीदरम्यान त्यांच्या विवेकबुद्धीने निर्णय घ्यावा, असे आवाहन या बैठकीत करण्यात आले.
दक्षिण-पश्चिममध्ये नोटा!
मुख्यमंत्री देवेंद्र फडणवीस यांच्या दक्षिण-पश्चिम मतदारसंघात आंदोलनाच्या सदस्यांनी आक्रमक भूमिका घेतली आहे. या मतदारसंघात खुल्या प्रवर्गातील मतदार मोठ्या संख्येने आहे. या विधानसभा निवडणुकीत कोणत्याही पक्षाला मतदान न करता 'नोटा'चा पर्याय वापरला जावा, असे संदेश या मतदारसंघातील 'सेव्ह मेरिट'च्या सदस्यांमध्ये फिरत आहेत. मात्र, आंदोलनाच्या वतीने कोणतीही अधिकृत राजकीय भूमिका घेण्यात आलेली नाही.
अॅड. अनुप मरार, डॉ, संजय देशपांडे, के. के. अग्रवाल, उत्पला मुलावकर, अॅड. अश्विन देशपांडे, महेश कारवा, के. के. अग्रवाल, संजय जैन, सचिन पोशेट्टीवार, अविनाश चौधरी यांच्यासह राज्यातील विविध भागातील पदाधिकारी या बैठकीला उपस्थित होते. चळवळीची आतापर्यंतची वाटचाल, येत्या काळात करायची आंदोलने, आरक्षण आणि इतर विषयांची कायदेशीर माहिती, या संदर्भात या राज्यस्तरीय बैठकीत चर्चा करण्यात आली.
..........