जिवंत विद्युत तार पायाला गुंडाळून शेतकऱ्याची आत्महत्या

म. टा. वृत्तसेवा, यवतमाळ

अतिवृष्टीने हातातोंडाशी आलेला घास हिरावला. शेतीसाठी लावलेला पैसा पाण्यात वाहून गेला. पुढच्या वर्षभराचे गणित बिघडले. घरातील चार तोंडांची भूक कशी भागवायची या चिंतेने ग्रासलेल्या एका शेतकऱ्याने जिवंत विजेची तार पायाला गुंडाळून आत्महत्या केली. काळीज पिळवटून टाकणारी ही घटना रविवारी सकाळी ८ वाजताच्या सुमारास महागाव तालुक्यातील उटी येथे घडली.

पंजाब महादेव गावंडे (६०), असे आत्महत्याग्रस्त शेतकऱ्याचे नाव आहे. पंजाब यांच्याकडे अडीच एकर शेत आहे. मजुरांकडून लागवड करणे पवडत नसल्याने स्वत:च दिवस-रात्र शेतात राबत असत. मागील तीन वर्षांपासून सातत्याने नापिकी होत असल्याने आर्थिक अडचण वाढली होती. याच काळात पत्नीही अंथरुणावर खिळली. उपचारासाठी गाठीला चार पैसैही शिल्लक नसल्याने त्यांनी कर्ज वाढले. यंदाच्या पिकातून ही सारी देणी फेडू या विश्वासाने त्यांनी स्वत:ला झोकून दिले होते. सुरुवातीच्या समाधानकारक पावसाने कपाशी बहरली. त्यांचा विश्वास अधिक दृढ होत गेला. मागील आठवड्यात झालेल्या अतिवृष्टीमुळे त्यांच्या शेतातील कपाशीचे पीक उद्ध्वस्त झाले. हे पाहून त्यांना अश्रू आवरणे कठीण झाले. कर्ज कसे फेडावे, पत्नीच्या उपचारासाठी पैसे कुठून आणायचे या विवंचनेने त्यांना ग्रासले. रविवारी सकाळी नेहमीप्रमाणे शेतावर गेले. मोटारपंपाजवळ असलेली विजेची वायर पायाला गुंडाळून घेतली. नंतर वीजप्रवाह सुरू केला. हे पाहताच शेजारच्या शेतात असलेला शेतकरी ओरडत धावून आला. तोवर सारेकाही संपले होते. त्याने तातडीने गावाकडे धाव घेत घटनेची माहिती दिली. मुलगा विश्वास याने वडिलांना त्वरित सवना शासकीय रुग्णालयात नेले. पण, डॉक्टरांनी त्यांना मृत घोषित केले.