दुकानदारांना दंड

सम-विषम नियमांचे उल्लंघन; गोपालनगर, प्रतापनगरात कारवाई

म.टा.विशेष प्रतिनिधी,नागपूर

लॉगडाउनमध्ये 'मिशन बिगिन अगेन'अंतर्गत देण्यात आलेल्या शिथीलतेत दुकानदारांसाठी सम-विषम नियम लागू आहे. मात्र, दुकानदार या नियमांचे सर्रास उल्लंघन करीत असल्याचे सोमवारी गोपालनगर, प्रतापनगरात उघडकीस आल्याने दुकानदारांवर दंडात्मक कारवाई करण्यात आली. महापौर संदीप जोशी यांच्या जनजागृती दौऱ्यात ही बाब उघडकीस आली. मनपाच्या उपद्रव शोध पथकाने दंड वसूल केला.

लॉकडाउनमधील शिथीलतेचा दुकानदारांकडून गैरफायदा घेण्यात येत असल्याची ओरड खरी ठरत आहे. अनेक दुकानदार या नियमांचे उल्लंघन करीत आहेत. अनेकजण दुकानाचे शटर अर्धवट सुरू ठेवून व्यवसाय करीत आहेत. ग्राहकांचाही त्यांना साथ असते. नियमांचे कठोरपणे पालन केल्यास कडक लॉकडाउन वा संचारबंदी टाळता येऊ शकते असे वारंवार सांगण्यात येत असतानाही शहरात बेजबाबदारपणे वागण्याची सवय बंद होत नसल्याचे दुदैंवी चित्र आहे. याचा फटका येणाऱ्या काळात संपूर्ण शहराला बसू शकतो. हे टाळता यावे म्हणूनच महापौरांनी जनजागृती दौरा सुरू केला आहे. सोमवारी त्यांनी माटे चौकातून दौऱ्याला सुरूवात केली. गोपालनगर, प्रतापनगर, खामला, देवनगर आदी भागातील दुकानांची पाहणी करीत कोव्हिड-१९ च्या संदर्भात शासनाने दिलेल्या दिशानिर्देशांचे पालन करण्याचे आवाहन केले. सम-विषम तारखांचा नियम दुकानदारांनी पाळावा. मास्क वापरावा, सुरक्षित वावर ठेवावा, अशी विनंतीही केली. नियम पाळा, अन्यथा कारवाईला सामोरे जावे लागेल, असा इशाराही महापौरांनी यावेळी दिला. त्यांच्यासोबत लक्ष्मीनगर झोनचे सभापती प्रकाश भोयर, शिक्षण समिती सभापती प्रा. दिलीप दिवे, उपसभापती प्रमोद तभाने, लक्ष्मीनगर झोनचे सहायक आयुक्त राजू भिवगडे आदी उपस्थित होते.