म. टा. वृत्तसेवा, गडचिरोली
माओवाद्यांचा बालेकिल्ला मानल्या जाणाऱ्या अबुझमाडच्या जंगलात शिरून सी-६०च्या जवानांनी पाच माओवाद्यांना अटक केली. त्यांच्याकडून तीन बंदुका व अन्य साहित्यही पोलिसांनी ताब्यात घेतले आहे. यातील तीन दलम सदस्य तर दोघे जनमिलिशिया आहेत. सर्वांवर लाखो रुपयांचे बक्षीस आहे.
रैनू सोनू वड्डे (२०), बंडू चक्कू वड्डे (२५), केये सायबी वड्डे( ४०) तिघेही रा. पदमकोट (छत्तीसगड ), सुखराम सोमा उसेंडी (४०), दोगे इरपा उसेंडी (३०) दोघेही रा. उसेवाडा (छत्तीसगड), अशी अटक करण्यात आलेल्यांची नावे असून त्यांच्याविरुद्ध लाहेरी उपपोलिस ठाण्यात गुन्हा दाखल करण्यात आला आहे.
महाराष्ट्र-छत्तीसगड सीमेवर लाहेरी हे शेवटचे पोलिस ठाणे आहे. या ठाण्यापासून ३० किलोमीटर अंतरावर भामरागड तालुक्यातील बिनागुंडाच्या पलीकडे पेरमिलभट्टी हे शेवटचे गाव आहे. माओवाद्यांची राजधानी मानल्या जाणाऱ्या अबुझमाडचा हा भाग आहे. माओवाद्यांच्या बड्या नेत्यांचे वास्तव्य या भागात असते. गडचिरोलीचे पोलिस अधीक्षक शैलेश बलकवडे यांनी मिळालेल्या गुप्त माहितीच्या आधारे या भागात मोहीम राबविण्यासाठी सी-६० जवानांचे पथक या भागात पाठविले. पेरमिलभट्टी गावाजवळ माओवाद्यांचा कॅम्प होता. हा भाग छत्तीसगडच्या उसेवाड गावाजवळ आहे. जवान कॅम्प परिसरात जाताच माओवाद्यांनी गोळीबार सुरू केला. सावध होत जवानांनी माओवाद्यांचा हल्ला परतावून लावत गावाला घेरले. शोध मोहीम राबवित असतानाच पाच माओवादी पळून जात असल्याचे दिसून आले. त्यांना तातडीने अटक करण्यात आली.
वरिष्ठ नेत्यांचे वास्तव्य
माओवाद्याच्या कंपनी क्रमांक १ आणि कुर्टूल दलमचे सुमारे ५० माओवादी या भागात वास्तव्याला होते, अशी माहिती पुढे आली आहे. कंपनी क्रमांक १ हे माओवाद्यांच्या केंद्रीय समितीच्या सदस्य असलेल्या वरिष्ठ नेत्यांच्या सुरक्षेसाठी असलेले दलम आहे. त्यामुळे या भागात माओवाद्यांचे वरिष्ठ नेते वास्तव्याला होते, अशी शक्यता व्यक्त होत आहे. विशेष म्हणजे, या भागात माओवाद्यांच्या वरिष्ठ नेत्यांसाठी उभारण्यात येणारी झोपडीही दिसून आली आहे. या झोपडीत माओवादी नेत्यांचा मुक्काम असतो.
सायंकाळी परतले जवान
अटक करण्यात आलेल्या पाच माओवाद्यांना घेऊन जवान बुधवारी सायंकाळी परतले. त्यांचा पेरमिलभट्टी ते लाहेरीपर्यंतचा संपूर्ण प्रवास धोकादायक मार्गावर झाला. तिथे माओवाद्यांकडून भूसुरुंग पेरलेली असतात. जवानांनी सॅटेलाइट फोनवरून पोलिस अधीक्षक शैलेश बलकवडे यांना माहिती दिली होती.