म.टा. प्रतिनिधी, नागपूर
हज यात्रेसाठी पहिले विमान शुक्रवार, २९ जुलै रोजी निघणार आहे. एका हज यात्रेकरूला विमान प्रवासात ४४ किलो एवढ्या कमाल वजनाचे साहित्य सोबत नेता येईल. सोबत २५ हजारांपेक्षा जास्त रोख रक्कम असू नये, अशा सूचना प्रशासनाच्यावतीने देण्यात देण्यात आल्या.
हज यात्रेसाठी बाबासाहेब आंबेडकर आंतरराष्ट्रीय विमानतळावरुन दोन टप्प्यांत २ हजार ८०० यात्रेकरू रवाना होणार आहेत. या यात्रेसाठी पहिले विमान शुक्रवारी निघणार असून, या विमानाच्या १९ फेऱ्या होणार आहेत. हज यात्रेकरूंचा प्रवास सुखरूप व्हावा, यासाठी प्रशासनाच्यावतीने विशेष सूचना देण्यात आल्या आहेत.
२५ हजारांपेक्षा जास्त पैसे नेणाऱ्या प्रवाशांची कस्टम विभागाकडून चौकशी होऊ शकते. यात यात्रेकरूंचा अधिकचा वेळ खर्ची होतो. यात्रेकरूंना त्रास होऊ नये यासाठी २५ हजार रुपयांपेक्षा जास्त रुपये बाळगू नये, असे आवाहन प्रशासनाकडून करण्यात आले आहे.
विमानतळ परिसरात नागपूर मनपातर्फे चार मोबाइल टॉयलेटची व्यवस्था करण्यात येणार आहे. हज यात्रेचे धार्मिक महात्म्य असल्याने यात्रेकरूंना शुभेच्छा देण्यासाठी मोठ्या प्रमाणावर नातेवाईक गर्दी करतात व त्यामुळे सुविधा तसेच सुरक्षा पुरविताना अतिरिक्त ताण निर्माण होतो. म्हणून त्यादृष्टीने यात्रेकरूंच्या नातेवाइकांनी प्रशासनाला सहकार्य करावे, असे आवाहन करण्यात आले आहे.
'सीसीटीव्ही'ची नजर
हज समितीच्यावतीने हज हाउस परिसरात सुरक्षेच्या दृष्टीने सीसीटीव्ही कॅमेरे लावण्यात येणार आहेत. यात्रेकरूंसाठी विदेशी चलनाकरिता हज हाउस येथे नेमलेल्या एजन्सीचे कक्ष स्थापन करण्यात येतील. आरोग्य विभागातर्फे यात्रेकरूंचे लसीकरण करण्यात यावे, यासाठी डॉक्टरांचे पथक तयार करण्यात येणार आहे. हज यात्रेकरूंसाठी विमानतळापर्यंत यात्रेकरूंचे सामान पोहोचविणे, त्यांच्यासाठी पिण्याच्या पाण्याची व्यवस्था असेल. रात्री परतीचा प्रवास करून येणाऱ्या यात्रेकरूंसाठी तंबूची व्यवस्था असेल.