मेट्रोच्या नावाने खोट्या जाहिराती
म.टा. प्रतिनिधी, नागपूर
'मेट्रो रेल्वेतील विविध १५० पदांकरिता पदभरती'… अशा खोट्या जाहिराती सोशल मीडियावर प्रसारित करून बेरोजगार युवकांना जाळ्यात ओढण्यासाठी नागपुरातील टोळक्यांकडून सापळे रचले जात आहेत. नागरिकांनी यापासून सावध राहण्याचे आवाहन महामेट्रोकडून करण्यात आले.
गेल्या काही दिवसांपासून महामेट्रो नागपूर मेट्रो मध्ये पदभरती होत असल्याची जाहिरात सोशल मीडियावर व्हायरल झाली आहे. विविध १५० पदाकरिता पदभरती होत असल्याचा दावा या जाहिरातीच्या माध्यमाने होत आहे, मात्र अशी कुठलीही जाहिरात महामेट्रोने प्रसिद्ध केली नसून सोशल मीडियावर व्हायरल झालेल्या जाहिरातीशी महामेट्रोचा काहीही सबंध नाही, असे स्पष्टीकरण महामेट्रोकडून देण्यात आले आहे.
कुठल्याही त्रयस्थ व्यक्तीमार्फत महामेट्रोची पदभरती होत नाही. पदभरतीशिवाय नागपूर मेट्रो रेल्वे प्रकल्पाशी निगडित असलेल्या विविध कामांसंबंधी व्यवसाय करण्याची संधी असल्याचा दावादेखील सोशल मीडियावर व्हायरल होत आहे. याचीदेखील शहानिशा प्रत्येकाने करावी, असे महामेट्रोने स्पष्ट केले.
-तर इथे साधा संपर्क
मेट्रो तर्फे पदभरती होत असतांना त्या संबंधीची सर्व माहिती महा मेट्रोची वेबसाईट www.mahametro.org व प्रतिष्ठीत वर्तमान पत्रांमध्ये प्रकाशित केल्या जाते. त्यामुळे पदभरती संबंधी कुठलीही माहिती मिळाल्यास याची संपूर्ण शाहनिशा महामेट्रोची वेबसाईट किंवा सिव्हील लाईन येथील मेट्रो रेल्वे कार्यालयातून करावी तसेच टोल फ्री क्रमांक : १८००२७००५५७ वर संपर्क साधावा, असे आवाहन करण्यात आले आहे.