चितळांची भेट; वनवैभवाचा आनंद

नागपूर : चितळांचा अधिवास असलेल्या नारा डेपो परिसरात वनविभागाच्यावतीने नारा अर्बन फॉरेस्ट पार्कची निर्मिती केली जाणार आहे. या पार्कच्या निमित्ताने विविध वनस्पती आणि सोयींनी समृद्ध असे ठिकाण नागपूरकरांना उपलब्ध करून दिले जाणार आहे.

नारा डेपो परिसरातील २१.७५ हेक्टर परिसरात या प्रकल्पाची निर्मिती केली जाणार आहे. पूर्वी ही जमीन महाराष्ट्र वन विकास महामंडळाकडे होती. १९९०मध्ये ती वन विभागाकडे हस्तांतरित करण्यात आली. या भागातील चितळ मानवी वस्तीत शिरण्याच्या तसेच त्यांच्यावर मोकाट कुत्र्यांचे हल्ले होण्याच्या घटनाही वारंवार घडल्या आहेत. या संपूर्ण परिसराला आता भिंतीने बंदिस्त जाणार आहे. येथे प्रामुख्याने बाभूळ, पळस यांसारखी झाडे आढळतात. त्यांच्या जोडीने नवे वृक्षारोपण करून या परिसराला हिरवाई प्राप्त करून देण्याचे नियोजन वन विभागाने केले आहे.

'या कामाचे अंदाजपत्रक बनविणे आणि आनुषंगिक नियोजन करणे सुरू आहे. त्यानंतरच लगेचच हे काम सुरू केले जाईल. विविध सुविधा आणि जैवविविधतेने युक्त असा हा परिसर विकसित केला जाईल. त्याकरिता सुमारे सहा कोटी रुपये खर्च अपेक्षित आहे', असे नागपूर वन विभागाचे उपवनसंरक्षक प्रभुनाथ शुक्ला यांनी सांगितले.

वैशिष्ट्ये अशी...

- सुमारे २०० चितळांचे वास्तव्य

- जंगली फुले, स्थानिक प्रजाती, वैशिष्ट्यपूर्ण प्रजातींच्या झाडांचे रोपण.

- लाकूड संग्रहालय, निसर्ग माहिती केंद्र, योग आणि ध्यान परिसर

- विविध वृक्ष प्रकारांचे वेगळे विभाग

- औषधी वनस्पती क्षेत्र, गवताळ भाग, पाणवठे

- निसर्गभ्रमण, बांबूबन भ्रमण, लहान मुलांच्या खेळण्याची सुविधा