भाजपची 'ती' ऑफर स्वीकारली असती तर...; माजी गृहमंत्री अनिल देशमुख यांनी सांगितली मन की बात

म.टा. विशेष प्रतिनिधी, नागपूर : ‘दोन वर्षांपूर्वी भाजपची ऑफर स्वीकारली असती आणि समझोता केला असता तर तुरुंगात गेलो नसतो आणि महाविकास आघाडी सरकार पडले असते’, असा दावा माजी गृहमंत्री अनिल देशमुख यांनी बुधवारी माध्यम प्रतिनिधींशी बोलताना केला.

‘मला व माझ्या कुटुंबीयांना १४ महिने भंयकर त्रास सहन करावा लागला. उलट परमवीरसिंग यांना सरकारने ‘बक्षिस’ दिले. ‘समझोता’चा अर्थ सर्व संबंधितांना व्यवस्थित समजेल’, असे सांगून त्यांनी यावर अधिक खुलासा करण्याचे टाळले. ‘पक्षाचे सर्व प्रमुख नेते, मित्रपक्ष काँग्रेस आणि शिवसेनेच्या नेत्यांनीही नेहमीच माझी पाठराखण केली. नाना पटोले यांना वस्तुस्थिती माहिती होती, म्हणून पाठराखण केली. एजन्सीचा कसा गैरवापर करून बदला घेण्याचे काम चालले आहे, याची त्यांना कल्पना आली. त्यांनी विधानसभा अध्यक्षपदाचा राजीनामा त्यावेळच्या स्थितीनुसार दिला, त्यामुळे आता जर-तरचे प्रश्न उपस्थित करण्यात अर्थ नाही’, असे अनिल देशमुख म्हणाले. काटोल, सावनेरमध्ये भाजपकडे उमेदवार नसल्याकडे लक्ष वेधले असता, याबाबत मला कल्पना नाही. त्यांची प्रक्रिया सुरू असेल, योग्य उमेदवार निवडतील, असे मत देशमुख यांनी व्यक्त केले.

Ashish Deshmukh: जायंट किलर आशीष देशमुखांना मोठा झटका, काँग्रेस पक्षातून ६ वर्षांसाठी हकालपट्टी, हे कारण
राष्ट्रवादी पक्षाच्या माध्यमातून दोन दिवसांचे ओबीसी संमेलन आयोजित केले आहे. शरद पवार यांच्यासह अनेक नेते येणार आहेत. विदर्भात मोठ्या प्रमाणात ओबीसी समाज आहे. त्यांचे प्रश्न सुटावेत, अशी पक्षाची भूमिका आहे, असेही अनिल देशमुख यांनी स्पष्ट केले.