वाढदिवसाची पार्टी जीवावर बेतली, अपघातात चार मित्रांचा मृत्यू; एक गंभीर

म. टा. वृत्तसेवा, चंद्रपूर : हॉटेलमध्ये मित्राच्या वाढदिवसाची पार्टी करून घरी परतताना भरधाव कार ट्रॅक्टरवर धडकल्याने भीषण अपघात झाला. यात चार मित्रांचा मृत्यू झाला. तर वाढदिवस असलेला युवक गंभीर जखमी आहे. चंद्रपूर-मूल मार्गावर अजयपूरनजीक मंगळवारी रात्री ही घटना घडली. अपघातात कारचा अक्षरश: चुराडा झाला आहे.

चंद्रपूर-मूल महामार्गावरील एका हॉटेलमध्ये योग गोगरी या युवकाचा २३ वा वाढदिवस साजरा करण्यासाठी तीन युवक व दोन युवती असे पाच मित्र गेले होते. 'बर्थडे सेलिब्रेशन' केल्यानंतर रात्री उशिरा सर्वजण घरी येण्यासाठी निघाले. योग गोगरी हा स्वतः गाडी चालवित होता. चंद्रपूर मार्गावरील चिचपल्ली-अजयपूर या रस्त्याच्या मध्ये एक तणीस भरलेला ट्रॅक्टर शेतातून मुख्य मार्गात येऊन उभा होता. त्यावेळी वेगात असलेली कार ट्रॅक्टरवर जोरदार धडकल्याने अपघात झाला. या अपघातात दर्शना उधवानी (२५), प्रगती निमगडे (२४), मोहम्मद अमन (२३) आणि स्मित पटेल (२५) या चार जणांचा मृत्यू झाला. वाढदिवस असलेला योग गोगरी हा गंभीर जखमी असून त्यांच्यावर चंद्रपुरातील एका खाजगी रुग्णालयात उपचार सुरू आहे. सर्व जण मूल येथील रहिवासी आहे. या घटनेमुळे परिसरात शोककळा पसरली आहे. याप्रकरणी ट्रॅक्टर चालकाविरोधात गुन्हा दाखल केला आहे.