म. टा. प्रतिनिधी, नागपूर
लोकशाहीच्या उत्सवात घटनेने दिलेल्या मतदानाच्या अधिकारापासून दिव्यांग बांधव वंचित राहता कामा नये, यासाठी शहरातील सहा विधानसभा मतदार संघात विखुरलेल्यांच्या सोयीसाठी जिल्हा प्रशासनाने १,५४० व्हीलचेअर उपलब्ध करून दिल्या. मात्र जे मतदार अतितीव्र गटात मोडतात आणि जिथे रँपची व्यवस्था नाही, अशा केंद्रांना फिरत्या चार पथकांमार्फत ऑनकॉल क्लाइम्बिंग व्हीलचेअर उपलब्ध करून देण्यात आल्या आहेत.
नागपूर शहरातल्या विधानसभेच्या सहा मतदार संघात प्रत्येक बुथवर एक, या प्रमाणे व्हीलचेअर उपलब्ध करून देण्यात आली आहे. तब्बल १,५४० व्हीलचेअर प्रत्येक मतदान केंद्र आणि बुथकडे रवाना करण्यात आल्या आहेत. अतितीव्र गटातील बहुविकलांग बांधव, वयोमानानुसार स्वत:हून मतदान केंद्रांपर्यंत जाऊ न शकणारे ज्येष्ठ नागरिक, अपघातामुळे कायम वा तात्पुरत्यास्वरुपात मतदान केंद्रांपर्यंत जाण्यापासून वंचित राहण्याची शक्यता असलेल्या मतदारांना स्वयंचलित व्हीलचेअरदेखील उपलब्ध करून देण्यात आल्या आहेत.
ज्या ठिकाणी रँपची व्यवस्था नाही, अशा मतदार केंद्रांमध्ये दिव्यांगांना मतदान प्रक्रियेत भाग घेता यावा, यासाठी चार मोबाइल स्वयंचलित व्हॅन शहरभर फिरणार आहेत. ऑनकॉल स्वरुपात या व्हॅनची अद्ययावत सुविधा उपलब्ध आहे. इंद्रधनू स्वयंसेवी संस्थेचे पी. एन. अंधारे यांनी प्रतापनगर, रीलिफ अॅलॉइड सर्व्हिसेसचे राजेश पारेख यांनी छापरूनगर परिसर, अरुण भावे, संजय पुसाम, अविनाश ठाकरे, अजय डोर्लीकर, अमोल अंभोरे, करुणा वंजारी मदतनीस म्हणून सहकार्य करणार आहेत. दक्षिण पश्चिम, नागपूर पश्चिम, दक्षिण, पश्चिम आणि मध्य या सह सर्व सहाही मतदार संघांत ही स्वयंचलित वाहने उपलब्ध करून देण्यात आली आहेत. मतदार केंद्रातील झोनल वा क्लस्टर अधिकाऱ्यांच्या मदतीने ही ऑनकॉल क्लाइम्बिंग व्हीलचेअर अतितीव्र गटातील दिव्यांगांना उपलब्ध करून दिली जाणार आहे.
.......