आजपासून राष्ट्रसंतांचा पुण्यतिथी महोत्सव

म. टा. प्रतिनिधी, नागपूर

अखिल भारतीय श्री गुरुदेव सेवा मंडळाच्यावतीने राष्ट्रसंत तुकडोजी महाराज यांचा सुवर्णमहोत्सवी पुण्यतिथी महोत्सव आयोजित करण्यात आला आहे. या महोत्सवानिमित्त अमरावती जिल्ह्यातील गुरुकुंज आश्रम मोझरी येथे २३ ऑक्टोबरपासून विविध कार्यक्रमांचे आयोजन करण्यात आले आहे.

राष्ट्रसंत तुकडोजी महाराज यांची पुण्यतिथी मानवता दिन म्हणून साजरी करण्यात येते. मराठी तिथीनुसार अश्विन वद्य पंचमीला म्हणजे २९ ऑक्टोबर रोजी मौन श्रद्धांजलीचा कार्यक्रम होणार आहे. राष्ट्रसंत तुकडोजी महाराज यांनी स्थापन केलेल्या संपूर्ण भारतातील शाखातील चार ते पाच लाख भाविक गुरुकुंज आश्रम येथे उपस्थित राहणार असल्याचे अखिल भारतीय श्री गुरुदेव सेवा मंडळाचे सरचिटणीस जनार्दन बोथे यांनी सांगितले.

मुख्यमंत्र्यांच्या हस्ते उद्घाटन

पुण्यतिथी महोत्सवाचे उद्घाटन २३ ऑक्टोबर रोजी दुपारी १२ वाजता होणार आहे. यावेळी मुख्यमंत्री देवेंद्र फडणवीस, केंद्रीय मंत्री नितीन गडकरी, अर्थमंत्री सुधीर मुनगंटीवार, पालकमंत्री प्रवीण पोटे, खासदार आनंद अडसूळ, आमदार यशोमती ठाकूर, कीर्ती भांगडिया आदी उपस्थित राहणार आहेत.

समाजप्रबोधनपर कार्यक्रम

या महोत्सवात तीर्थस्थापना, चरणपादुका आणि महासमाधी अभिषेक, अखंड विणा वादन, शोभायात्रा, सामादायिक ध्यान, योगासन, ग्रामगीता वाचन, भजन संमेलन, खंजरी भजन, कीर्तन, हृद्यरोगापासून कसे वाचाल, आंतरमहाविद्यालयीन वक्तृत्व स्पर्धा, युवा संमेलन, आदर्श गावाची यशोगाथा, शाहिरी लोकरंग, क्रांतिनायक राष्ट्रसंत तुकडोजी महाराज यांच्यावरील नाटक, अभंग गायन, आपल्या गावालाच बनवा तीर्थस्थळ यासारखे विविध समाजप्रबोधनपर कार्यक्रम ३० ऑक्टोबरपर्यंत सादर करण्यात येणार आहेत.