मनपा-नागपूर स्त्री रोग संघटनेचे आयोजन, मार्गदर्शन-चर्चासत्र
म. टा. विशेष प्रतिनिधी,नागपूर
नागपूर महानगरपालिका आणि नागपूर स्त्री रोग संघटना यांच्या संयुक्त विद्यमाने, आधार, इंडियन डायेटिक असोशिएशन आणि 'विष्णूजी की रसोई' यांच्या सहकार्याने कविवर्य सुरेश भट सभागृहात ६ व ७ सप्टेंबर रोजी दोन दिवसीय 'पोषण आहार प्रदर्शनी'चे आयोजन करण्यात आल्याची माहिती महिला व बालकल्याण समिती सभापती प्रगती पाटील यांनी पत्रपरिषदेत दिली.
प्रदर्शनीचे उद्घाटन गुरुवार, ६ सप्टेंबर रोजी सकाळी ११ वाजता महापौर नंदा जिचकार यांच्या हस्ते होईल. यावेळी महिला व बालकल्याण समितीच्या सभापती प्रगती पाटील, उपसभापती विशाखा मोहोड उपस्थित राहतील. यानंतर विविध वयोगटातील स्त्रियांचे आहार व आरोग्य यावर चर्चासत्र होईल. यामध्ये नामवंत डॉक्टरांचा सहभाग असेल. दुपारी ३ वाजता विशेष तज्ज्ञ डॉक्टरांचे विविध आजारांवरील आहारविषयक मार्गदर्शन होईल. दुपारी ३.४५ वाजता प्रख्यात शेफ विष्णू मनोहर हे व्हिडिओच्या माध्यमातून मार्गदर्शन करतील. यानंतर चर्चा व प्रश्नोत्तरांचा तास आयोजित करण्यात येईल.
७ सप्टेंबर रोजी सकाळी ११ वाजता महाविद्यालयीन युवतींसाठी 'डायेट प्रिंसेस' आणि महिलांसाठी 'डायेट क्वीन' ह्या विशेष स्पर्धेचे आयोजन करण्यात आले आहे. यानंतर शालेय गटातील मुलींसाठी आहारविषयक प्रश्नमंजूषा होईल. दुपारी १२ वाजता चर्चासत्र आणि दुपारी ३ वाजता आहारविषयक महत्त्वाच्या सूचना तज्ज्ञांकडून देण्यात येतील. दुपारी ३.३० वाजता विष्णू मनोहर व्हिडिओच्या माध्यमातून मार्गदर्शन करतील. पोषण आहार प्रदर्शनीच्या निमित्ताने घेण्यात आलेल्या 'विस्मृतीत जात असणाऱ्या पौष्टिक भारतीय पाककृती, डायेट प्रिंसेस, डायेट क्वीन आणि प्रश्नमंजूषा या विविध स्पर्धांचे बक्षीस वितरण सायंकाळी ४ वाजता मान्यवरांच्या हस्ते करण्यात येईल. या प्रदर्शनीचा, चर्चासत्रांचा आणि स्पर्धांचा लाभ घेण्याचे आवाहन नागपूर महानगरपालिकेच्या उपायुक्त डॉ. रंजना लाडे, नागपूर स्त्री रोग संघटनेच्या अध्यक्ष डॉ. कांचन सोरते, सचिव डॉ. सुषमा देशमुख, इंडियन डायेटिक असोसिएशनच्या अध्यक्ष डॉ. रिता भार्गव, सचिव कविता बक्षी, 'आधार'चे अध्यक्ष अविनाश रोडे यांनी केले आहे.
प्रदर्शनीची वैशिष्टये
पोषक आहार प्रदर्शनीमध्ये नागपुरातील तज्ज्ञ डाक्टरांचा समावेश असेल. बाल्यावस्था व पौगंडावस्थेतील मुलींसाठी विशेष आहाराचे मार्गदर्शन, प्रजननशील अवस्थेतील स्त्रियांसाठी समतोल आहारवर मार्गदर्शन, गर्भवती महिलांसाठी पोषक आहार तत्त्वांची आखणी, प्रौढावस्था व वृद्धापकाळातील महिलांसाठी आहारविषयक माहिती, गर्भावस्थेतील मधुमेह (डायबेटिस), रक्तदाब (हायपरटेंशन), हृदयविकार, मूत्रपिंड विकार अशा वेगवेगळ्या आजारांवरील आहाराचे मार्गदर्शन, पॉलसिस्टिक ओव्हेरियन सिंड्रोम, लठ्ठपणा यावर विशेष आहार मार्गदर्शन, विस्मृतीत गेलेल्या पौष्टिक पाककृतींबद्दल माहिती, आहारविषयक व्याख्यान, प्रात्यक्षिके, प्रश्नोत्तरे आदी प्रदर्शनीचे वैशिष्ट्य राहतील.
......
.