दोन मुलींचा बुडून मृत्यू

म.टा. वृत्तसेवा, गडचिरोली

सिरोंचा शहराला लागून असलेल्या प्राणहिता नदीपात्रात कपडे धुण्यासाठी गेलेल्या दोन मुलींचा पाण्यात बुडून मृत्यू झालर. ही घटना बुधवारी सकाळी ११ वाजताच्या सुमारास घडली. सपना तिरूपती पस्तम (वय ११, रा. बेल्लमपल्ली, तेलंगणा), व्यंकटरमना सारय्या कठबंजी (वय ११, रा. भूपालपल्ली, तेलंगणा) अशी मृत मुलींची नावे आहेत.

प्राप्त माहितीनुसार, तेलंगणा राज्यातील बेल्लमपल्ली येथील रहिवासी असलेले एक कुटुंब मागील अनेक दिवसांपासून सिरोंचा येथील विठ्ठल मंदिरासमोरील खुल्या जागेवर झोपडपट्टी उभारून राहत होते. सदर कुटुंबीय दिवसभर गावागावात भांडे खरेदी-विक्री करून आपल्या कुटुंबाचा उदरनिर्वाह करीत होते. बुधवारी सकाळी ११ वाजताच्या सुमारास या झोपडपट्टीतील दोन मुली प्राणहिता नदीघाटावर कपडे धुण्याकरिता गेल्या होत्या. कपडे धुत असताना त्या नदीच्या खोल पात्रात गेल्याने त्यांचा बुडून मृत्यू झाला. घटनेची माहिती मिळताच सिरोंचाचे उपविभागीय पोलिस अधिकारी राठोड यांनी आपल्या कर्मचाऱ्यांसह घटनास्थळी धाव घेत मुलींची शोधमोहीम सुरू केली. रात्री ‌उशिरापर्यंत दोन्ही मुलींचे मृतदेह सापडले नव्हते.

जिवावर बेतली १५ ऑगस्टची सहल

नागपूर : मित्रांसोबत १५ ऑगस्टची सहल करण्यासाठी नदीवर गेलेल्या युवकाचा बुडून मृत्यू झाला. ही घटना पारशिवनी पोलिस स्टेशनच्या हद्दीत कन्हान नदीवरील महादुला डोह येथे घडली. यश नरेंद्र मेश्राम (वय १७, रा. गिटीखदान) असे मृत युवकाचे नाव आहे. पाण्याचा मोहात अनेक युवक आपला जीव गमावत असताना वारंवार होणाऱ्या घटनांमुळे चिंता व्यक्त करण्यात येत आहे.

यश हा आपल्या काही मित्रांसोबत १५ ऑगस्ट रोजी सहलीसाठी वाकी येथे गेला होता. घरून जाताना त्याने वड‌िलांना मित्रांसोबत बाहेर जात असल्याचे सांगून ५० रुपयेसुद्धा मागितले. दोन मोटरसाकलवर यश व त्याचे मित्र सुरुवातीला वाकी येथे गेले. नंतर ते कन्हान नदीच्या महादुला डोहाजवळ गेले. तेथे सर्वच मित्रांनी पोहोण्याचा बेत आखला. यशला पोहणे येत नसल्याने अचानक तो खोल पाण्यात गेल्याने तो बुडू लागला. त्याच्या मित्रांनी तसेच डोहावर असलेल्या इतर युवकांनी त्याला वाचविण्याचा प्रयत्न केला. परंतु, त्यांना यशला वाचविता आले नाही. पारशिवनी पोलिसांनी स्थानिकांच्या मदतीने यशचा शोध घेतला असता सायंकाळच्या सुमारास यशचा मृतदेहच आढळला.