यवतमाळमध्ये पार पडला पहिला समलिंगी विवाह

यवतमाळ :

यवतमाळमधला पहिला समलिंगी विवाह नुकताच पार पडला. यवतमाळच्या ऋषी साठवणे याने विन्ह या कॅलिफोर्नियातल्या पुरुषाशी लग्न केले आहे. दोघेही एका ऑनलाइन डेटिंग वेबसाइटच्या माध्यमातून ऑक्टोबर २०१६ ला भेटले. या लग्नाला दोघांच्याही घरच्यांची संमती होती. लग्न आपल्या गावात व्हावं, अशी ऋषीच्या पालकांची इच्छा होती.

आयआयटी मुंबईत शिकलेला ऋषी (४३) हा व्यवसायाने मार्केटिंग स्ट्रॅटेजिस्ट आहे. तो समलिंगी आहे हे कळल्यानंतर तब्बल पाच वर्षांनी त्याच्या पालकांनी त्याची ही ओळख स्वीकारली. मागील वर्षी सनफ्रान्सिस्कोत झालेल्या LGBT समुदायाच्या सन्मान रॅलीत ऋषीच्या पालकांनी त्याच्यासोबत सहभाग घेतला होता. विन्ह हा ३५ वर्षीय व्हिएतनामी नागरिक असून पेशाने शिक्षक आहे. तो १९९० ला अमेरिकेत स्थायिक झाला.

लग्नाचा सोहळा ऋषीचे मुंबई, पुण्यातले आणि दिल्लीतले मित्र तसेच काही जवळच्या नातेवाईकांच्या उपस्थितीत झाला. 'मी याला लग्नापेक्षाही नात्याच्या बांधिलकीचा समारंभ म्हणेन. माझ्यासाठी माझं विन्हशी असलेलं नातं माझ्या सुहृदांसोबत शेअर करणं जास्त महत्त्वाचं आहे,' असे ऋषी म्हणाला. 'भारत हे सर्वसमावेशक आणि उदारमतवादी राष्ट्र आहे. ब्रिटीशांनी ३७७ कलम आणले होते, पण ते भारतातल्या एलजीबीटी समुदायावर विपरित परिणाम करणारे असल्याने हटवायला हवे,' असेही ऋषी म्हणतो.