म. टा. प्रतिनिधी, नागपूर
मिहानमध्ये वाघाचे अस्तित्व निश्चित झाल्यानंतर वनविभागाने या परिसरातील कंपन्यांना पत्रे लिहून सूचना केल्या आहेत. कंपन्यांमध्ये जाताना कारचा वापर करावा तसेच एकट्या-दुकट्याने फिरण्याऐवजी समूहात फिरा,' असे वन विभागाने स्पष्टपणे कळविले आहे. दरम्यान, वाघाच्या या परिसरातील संचारामुळे भीतीचे वातावरण निर्माण झाले आहे.
मिहानमधील सॉफ्टवेअर कंपन्यांच्या परिसरात शुक्रवारी रात्री वाघ दिसल्याच्या बातमीने खळबळ उडाली होती. या परिसरातील इन्फोसिसच्या मागील भागातील रस्त्यावर हा वाघ दिसून आला होता. कॅमेरा ट्रॅपमध्ये वाघ दिसल्यानंतर हा मार्ग बॅरिकेडस लावून बंद करण्याच्या सूचना वन विभागाने दिल्या आहेत. टीसीएस, इन्फोसिससह इतर कंपन्यांना वन विभागाने सूचनेची पत्रे पाठविली आहेत. रस्त्याने जाताना बाइकवरून खाली उतरू नये, एकटे दुकटे फिरू नये, कारने येणे-जाणे करावे, अशाही सूचना देण्यात आल्या आहेत. या परिसरात सुरक्षेसाठी वन विभागाच्या चमूसह मिहानच्या सुरक्षारक्षकांचा उपयोग करून घेण्यात येत आहेत.
या शिवाय, दहेगाव, कलकुही, तेल्हारा अशा आजूबाजूच्या गावांमध्ये वन विभागाने सूचनापत्रे, पोस्टर्स वितरित केले असून सार्वजनिक स्थळीदेखील ते लावण्यात आले आहेत. गावकऱ्यांना देखील काळजी घेण्याच्या सूचना वन विभागाने दिल्या आहेत. दरम्यान, वन विभागाने कॅमेरा ट्रॅपची संख्या २५ वरून ३० पर्यंत नेण्यात आली आहे. मात्र, मंगळवारी वाघाची छायाचित्रे कॅमेरा ट्रॅपमध्ये दिसून आलेली नाहीत. हिंगणा परिसरातून झुडुपी जंगले आणि शेती यांच्यातून चालत हा वाघ मिहानमध्ये पोहोचला असावा. या परिसरात फारसे जंगल नसताना आणि योग्य अधिवास नसतानाही हा वाघ मिहानपर्यंत पोहोचला आहे. कॅमेरा ट्रॅपमधील छायाचित्रे वाघाच्या पाठीमागच्या भागातील आहेत. त्यामुळे, या वाघाचे वय निश्चितपणे सांगणे कठीण आहे. ऑगस्ट महिन्यात फेटरी परिसरात आढळलेला वाघ आणि मिहानमधील वाघ एकच आहे का, हे ही अद्याप सांगता येणार नाही. कॅमेरा ट्रॅपमध्ये अधिक स्पष्ट छायाचित्रे आल्यास निश्चितपणे काही सांगता येईल, असे नागपूरचे उपवनसंरक्षक प्रभुनाथ शुक्ला यांनी 'मटा'शी बोलताना सांगितले.
वन विभागाने सुमारे २५ कर्मचाऱ्यांच्या एका चमूची या परिसरावर निगराणी करण्यासाठी नियुक्ती केली आहे. या परिसरात काही दुर्दैवी घटना घडू नये, यासाठी वनविभाग २४ तास लक्ष ठेवण्यात येत असून, विविध पाळ्यांमध्ये वन विभागाच्या कर्मचाऱ्यांच्या गस्तीसाठी नेमणुकी करण्यात आल्या आहेत.
.................................