दुकानांसमोर मोठी गर्दी : सुरक्षित वावरचे उल्लंघन; शहरातील अनेकांची ग्रामीणकडे धाव
म.टा. प्रतिनिधी, नागपूर
सकाळी नऊही वाजत नाही, तोच अनेक मद्यप्रेमी मद्यालयांसमोर जमायला सुरुवात झाली. वाढती गर्दी लक्षात घेता मद्यप्रेमींच्या रांगा लावण्यात आल्या. बघता बघता गर्दीची ही रांग वाढत गेली. शहरात केवळ ऑनलाइन मद्यविक्री असल्याने शहरातील मद्यप्रेमींनीही ग्रामीणकडे धाव घेतली. शहराला लागून असलेल्या हिंगणा मार्ग, खापरी, वाडी या भागांतील दुकनांसमोर कमालीची वर्दळ वाढली. करोनाचे संकट झुगारत मद्यप्रेमींनी सुरक्षित वावरचे उल्लंघन केल्याचे चित्र शुक्रवारी दिवसभर दिसले.
राज्य उत्पादन शुल्क विभागाच्या मार्गदर्शक सूचनांनुसार मद्यनिर्मिती आणि मद्यविक्रीला अटी, शर्तीवर जिल्हाधिकारी रवींद्र ठाकरे यांनी परवानगी दिली. त्यानुसार, १५ मेपासून मद्यविक्रीला सुरुवात झाली. ऑनलाइन मद्यविक्रीला पहिल्या दिवशी फारसा प्रतिसाद मिळाला नाही. ग्रामीणमध्ये मद्यालये सुरू असल्याने शहरातील मद्यप्रेमीही शहराला लागून असलेल्या ग्रामीण भागात पोहोचले. मद्यालयांसमोर गर्दी होणार नाही, या अटीवरच ही परवानगी देण्यात आली. मात्र, पहिल्याच दिवशी या सर्व नियमांचा फज्जा उडाल्याचे दिसून आले. हिंगणा मार्गावरील क्वीन्स वाइनसमोर तर दुकानांच्या दोन्ही बाजूंनी रांगा लागल्या होत्या. रस्त्याच्या पलीकडेही तेवढेच लोक उभे होते. मद्यविक्रीवर नियंत्रण मिळविणारी यंत्रणा पहिल्याच दिवशी अपयशी ठरल्याने परिसरातील नागरिकांकडून रोष व्यक्त करण्यात आला.
पोलिसांनी पांगवले...
मद्यालयांसमोरील गर्दी नियंत्रणाबाहेर जात असल्याचे लक्षात येताच जिल्हाधिकाऱ्यांनी पोलिसांना अधिक कुमक घेऊन जाण्यास सांगितले. पोलिसांचा ताफा हिंगणा मार्गावर पोहोचला. काठी उगारून पोलिसांनी गर्दी पांगवली. कुणीही गर्दी करू नये, अशा सूचना पोलिसांकडून वारंवार देण्यात येत होत्या. मात्र, दुकान बंद होईपर्यंत गर्दी कायम असल्याचे दिसून आले. काही ठिकाणी तर सुमारे एक किलोमीटरपर्यंत रांगा लागल्या होत्या. यात कॉलेजच्या युवकांचा अधिक समावेश होता.
चला, आता उद्या येऊ!
सकाळी १० ते सायंकाळी ५ वाजेपर्यंतच मद्यविक्रीला परवानगी देण्यात होती. मात्र, पहिल्या दिवशी दुकाने बंद करेपर्यंत गर्दी कायम होती. अनेकांना मद्य मिळाले नसल्याने त्यांना निराश होऊन परत जावे लागले. 'आता उद्या रांगेत लागू', असे म्हणत अनेकजण परत गेले.
भर उन्हात मोठ्या आशेत...
मद्यालयांसमोर मोठी रांग लागली होती. कडक उन्हामध्ये मद्यप्रेमींनी अख्खा दिवस मद्यालयासमोर घालविला. मद्य घेतल्याशिवाय परत जायचे नाही, असा निर्धार करूनच अनेकजण येथे आले होते. करोनाची भीती कुणाच्याही चेहऱ्यावर पाहायला मिळाली नाही. काहींनी तर मास्कही घातले नव्हते. रस्त्यांवर अचानक वाढलेल्या गर्दीमुळे प्रशासनाची डोकेदुखी मात्र वाढली.
वाहतुकीला अडसर
दुकानासमोर पाचपेक्षा अधिक ग्राहक असता कामा नये, असे जिल्हाधिकाऱ्यांच्या आदेशात स्पष्ट म्हटले होते. दुकानासमोर दुकानदाराने तसे पाच वर्तुळही आखले होते. मात्र, वाढलेल्या गर्दीमुळे सुरक्षित वावरच्या उद्देशाला हरताळ फासला गेला. चक्क रस्त्यांवरच रांगा लावल्याने वाहतुकीस मोठा अडसर निर्माण झाला होता. दोन ग्राहकांमध्ये किमान सहा फुटांचे अंतर असणे अपेक्षित होते. मात्र, कुणीच ग्राहक हा नियम पाळताना दिसला नाही.
देशीच्या बाटल्या रस्त्यावर
मद्यालयातून केवळ मद्याची विक्री होईल, कुणालाही तिथे दारू पिता येणार नाही, असे आदेशात नमूद असतानाही मद्यालयाशेजारीच देशी दारूच्या बाटल्या पडल्याचे दिसून आले.
घरपोचसाठी व्हॉट्सअप क्रमांक
शहर आणि ग्रामीणमधील मद्यालयांनी घरपोच मद्यसेवा पुरविण्यासाठी व्हॉट्सअप क्रमांक देऊ केला आहे. घरपोच मद्यविक्री केवळ परवाना असणाऱ्या ग्राहकांनाच करता येईल. परवान्यासाठी https://stateexcise.maharashtra.gov.in किंवा https://exciseservices.mahaonline.gov.in या संकेतस्थळावर संपर्क साधावा लागेल. याचबरोबर मद्यविक्रेत्यांकडूनही एक दिवसाला परवाना देण्याची सुविधा उपलब्ध करून देण्यात आली.
एकूण मद्यालये
एफएल २ (वाइन शॉप) : ११५
एफएलबीआर २ (बीअर शॉपी) : ८४
सीएल ३ (देशी दारू) : १७२
----------------------------------
एकूण : ३७१