नागपूर : 'अंगावर घाण पडली' असे सांगून तीन चोरट्यांनी दोन लाख ४० हजारांची रोख असलेली पिशवी लंपास केली. ही घटना मंगळवारी दुपारी ३ वाजताच्या सुमारास पांदण मार्गावरील विद्यानगर भागात घडली. दिनेश अग्रवाल रा. वाठोडा हे फार्मास्युटिकल कंपनीत व्यवस्थापक आहेत. मंगळवारी दुपारी त्यांनी वर्धमाननगरमधील कॉर्पोरेशन बँकेतून दोन लाख ४० हजार रुपये काढले. ही रक्कम पिशवीत ठेवून मोटरसायकलने ते घरी जात होते. याचदरम्यान कुणीतरी त्यांच्या पाठीवर घाण फेकली. एका चोरट्याने घाणीबाबत माहिती दिली. अग्रवाल हे घाण साफ करताना अन्य एका चोरट्याने साथीदाराच्या मदतीने रोख रक्कम असलेली पिशवी लंपास केली. याप्रकरणी नंदनवन पोलिसांनी गुन्हा दाखल करून चोरट्यांचा शोध सुरू केला आहे.
.....
पूनम अर्बन घोटाळा; फलटणकर गजाआड
नागपूर : रेशीमबाग येथील पूनम अर्बन क्रेडिट को-ऑपरेटिव्ह बँकेतील घोटाळा प्रकरणात आर्थिक गुन्हेशाखा पोलिसांनी आणखी एका आरोपीला अटक केली आहे. अरुण लक्ष्मणराव फलटणकर, असे अटकेतील आरोपीचे नाव आहे. याप्रकरणात अटकेतील आरोपींची संख्या आता तीन झाली आहे. गुन्हा दाखल झाल्यापासून फलटणकर फरार होते.