म. टा. प्रतिनिधी, नागपूर
मोठमोठाल्या उद्योजकांमध्ये असलेल्या आंतरराष्ट्रीय स्पर्धेचा हा काळ आहे…. मात्र, या काळातही कलाकुसरीने विविध उपयोगी वस्तू निर्माण करणारा ग्रामीण भागातील वर्ग दुर्लक्षित राहू नये. त्यांच्या हाताला बळ मिळावे आणि या ग्राम उन्नतीतून राष्ट्राच्या उज्ज्वलतेचे स्वप्न साकार व्हावे, यासाठी ग्रामायणाला सुरुवात झाली….
दीक्षाभूमीजवळील द ब्लाइंड रीलिफ असोसिएशनचे मुंडले इंग्लिश मीडियम स्कूल परिसरात शनिवारी ग्रामायण सेवा प्रदर्शन सुरू झाले. उद्घाटनाच्या कार्यक्रमाला महापौर नंदा जिचकार, व्यापारी महासंघाचे राष्ट्रीय अध्यक्ष बी. सी. भरतिया, ग्रामोपयोगी विज्ञान केंद्राचे संचालक सोहम पंड्या, दिव्यांग एव्हरेस्टवीर अशोक मुन्ने, सुरेंद्र लोढा, निखिल मुंडले, नागेश कानगे, 'ग्रामायण'चे अध्यक्ष अनिल सांबरे आदी उपस्थित होते.
ग्रामीण भागात काम करणाऱ्या सेवाभावी संस्थांचे आणि शेतकरी, व्यावसायिक, कलाकार, कार्यकर्ता यांचे कार्य शहरातील नागरिकांपर्यंत पोहोचावे. युवा पिढी आणि विद्यार्थ्यांना यापासून शिकता यावे, या उद्देशाने ग्रामायण प्रदर्शन भरविण्यात आले असल्याचे यावेळी सांबरे यांनी सांगितले. प्रदर्शनाच्या चार दिवसांत विविध सामाजिक विषयांवर विचारमंथन होणार आहे.
उपयुक्त वस्तूंचा खजिना
२० नोव्हेंबरपर्यंत चालणाऱ्या या प्रदर्शनाच्या माध्यमातून विविध कलाकुसरीच्या वस्तूंसह इतरही उपयुक्त वस्तूंचा खजिना या प्रदर्शनाच्या माध्यमातून उपलब्ध झाला आहे. विदर्भातील वेगवेगळ्या भागातून १२५ उपयुक्त वस्तूंचे स्टॉल या प्रदर्शनात लावण्यात आले आहे. पती-पत्नींनी सुरू केलेल्या आपल्या छोट्याशा व्यवसायाला या उपक्रमातून बळ मिळत आहे. चंद्रकांत रागीट, संजय सराफ, अनुराधा सांबरे, मंजूषा रागीट, सुरेखा सराफ, श्रीकांत गाडगे आदींच्या सहकार्यातून ही संकल्पना राबविली जात असल्याचे सांबरे यांनी सांगितले.
उपयुक्त वस्तूंच्या प्रदर्शनाबरोबर दिव्यांगांसाठी विविध कार्यक्रम आयोजित करण्यात आले आहे. महिलांचे संमेलन, सेंद्रिय शेती, गोशाळा सामूहिक व्यवस्थापन, प्राध्यापक विद्यार्थी संमेलन घेण्यात येणार आहे.
.......