दारूड्या नातवानं दगडाने ठेचून केली आजीची हत्या

नागपूर : हटकल्याने संतप्त झालेल्या नातवाने दगडाने डोके ठेचून आजीची हत्या केली. ही थरारक घटना मानवतानगरमध्ये सोमवारी मध्यरात्री १२ वाजताच्या सुमारास घडली. गिट्टीखदान पोलिसांनी खुनाचा गुन्हा दाखल करून मारेकरी नातवाला अटक केली आहे.

राऊलाबाई ऊर्फ राहुलाबाई रामदास गणवीर (वय ७०) ,असे मृताचे तर, लकी सुंदर गणवीर (वय २०), असे अटकेतील मारेकऱ्याचे नाव आहे. लकी हा भाजीपालाच्या दुकानात काम करतो. त्याला दारूचे व्यसन आहे. दारू पिऊन तो नेहमी लहान-बहीण निकिताला मारहाण करायचा. रविवारी लकी याने निकिताला मारहाण केली. त्यामुळे निकिती ही आईसह पांढराबोडी येथे राहणाऱ्या मावशीकडे गेली. सोमवारी रात्री लकी हा दारू पिऊन घरी आला. त्याने शिविगाळ करायला सुरूवात केली. राऊलाबाई यांनी त्याला हटकले. लकी संतापला. त्याने दगडाने डोके ठेचून राऊलाबाई यांची हत्या केली व पसार झाला. शेजाऱ्यांनी घटनेची माहिती गिट्टीखदान पोलिसांना दिली. माहिती मिळताच गिट्टीखदान पोलिस स्टेशनचे वरिष्ठ पोलिस निरीक्षक सुनील गांगुर्डे यांच्यासह पोलिसांचा ताफा तेथे पोहोचला. पोलिसांनी शोध घेऊन लकी याला अटक केली. पोलिसांनी लकी याला मंगळवारी न्यायालयात हजर केले. न्यायालयाने त्याची ६ मार्चपर्यंत पोलिस कोठडीत रवानगी केली.