पीएसआयसह दोघांना हृदयविकाराचा धक्का

नागपूर : पावसाळी अधिवेशनासाठी नागपुरात मोर्चा बंदोबस्तात तैनात पोलिस उपनिरीक्षकासह दोघांना हृदयविकाराचा धक्क्याने हॉस्पिटलमध्ये दाखल करण्यात आले. सोमवारी दुपारी १ वाजताच्या सुमारास मॉरिस कॉलेज टी-पॉइंन्टजवळ बुलडाणाचे पोलिस उपनिरीक्षक सय्यद जब्बार यांना हृदयविकाराचा झटका आला. ते बेशुद्ध झाले. याबाबत कळताच मोर्चा पॉइन्ट परिसरात तैनात डॉ. संदीप शिंदे व त्यांचे सहकारी तेथे पोहोचले. तपासणी केली असता सय्यद यांना हृदयविकाराचा धक्का आल्याचे निष्पन्न झाले. शिंदे यांनी लगेच सय्यद यांना धंतोलीतील श्रीकृष्ण रुग्णालय येथे दाखल केले. दरम्यान, रविवारीही औरंगाबाद येथील महिला पोलिस भीमाबाई बोरडे (४५) यांची प्रकृती खालावली. त्यांना हॉस्पिटलमध्ये दाखल करण्यात आले. तपासणीदरम्यान हृदयविकाराच्या धक्क्याने त्यांची प्रकृती खालावल्याचे निदान झाले. त्यांच्यावर खासगी हॉस्पिटलमध्ये उपचार सुरू आहेत.