विदर्भात उष्णतेचा कहर सुरुच, २ दिवस ऑरेंज अलर्ट

नागपूर : संपूर्ण विदर्भात उष्णतेचा कहर सुरुच आहे. हवामान विभागाने पुढील दोन दिवस ऑरेंज अलर्ट जारी केला आहे. त्यानुसार नागपूर, चंद्रपूर आणि अकोला येथे अधिक प्रभाव राहणार आहे.

बुधवारी चंद्रपूरचे तापमान सर्वाधिक ४६.४ अंश सेल्सिअस नोंदविण्यात आले. नागपूर आणि वर्ध्याचे तापमान अनुक्रमे ४६, ४५.५ अंश सेल्सिअस होते. नागपूरचा पारा सहा दिवसांत एकदाही ४५ अंशाच्या खाली गेलेला नाही. आता हवामान विभागाने दिलेल्या ऑरेंज अलर्टनुसार पुढील दोन दिवस उन्हाचे चटके कायम राहणार आहेत. त्यामुळे 'मे हिट'चा फटका बसण्याची भीती व्यक्त होत आहे. नागरिकांनी दुपारी १२ ते सायंकाळी ५ घराबाहेर पडणे टाळावे. अत्यावश्यक असेल तर उन्हात बाहेर पडण्यापूर्वी संपूर्ण शरीर झाकावे. विशेषत: कान झाकल्या जाईल अशा प्रकारे डोक्याला दुपट्टा, स्कार्फ बांधावा, असे आवाहन प्रादेशिक हवामान विभागातील वैज्ञानिक ब्रजेश कनोजिया यांनी केले आहे.