होमगार्डसचा गणेशोत्सव बंदोबस्तावर बहिष्कार

अकोला: गणेशोत्सव, दुर्गाउत्सव, दसरा, दिवाळी, निवडणूका, मंत्र्यांचे दौरे, जाहीर सभा यासारख्या कार्यक्रमातून पोलिसांएवढेच काम होमगार्डस यांनाही करावे लागतात. मात्र तरीही त्यांना नाममात्र मानधन मिळते. त्यासाठी पहिल्यांदाच होमगार्डस मंडळींनी गणेशोत्सव बंदोबस्तावर बहिष्कार टाकला आहे.

संपूर्ण ३६५ दिवस काम असावे, सेवेतून बाद केलेल्या होमगार्ड यांना पुन्हा सेवेत रुजू करुन घेणे, वयोमर्यादा ६५ पर्यंत करणे, सेवेत कायम करुन घ्यावे, पेन्शन योजना लागू करावी यासारख्या अनेक मागण्यांसाठी त्यांचा हा बहिष्कार आहे. कुठल्याही सणाला किंवा उत्सवाच्या काळात पोलिसांच्या खांद्याला खांदा लावून होमगार्डस प्रत्येक जिल्ह्यात काम करीत असतात. अतिशय तुटपुंज्या मानधनावर ही मंडळी दिवस रात्र काम करतात. मात्र संपूर्ण वर्षभरात ९० ते १०० दिवसच त्यांना रोजगार मिळतो, वर्षातील इतर दिवशी उदरनिर्वाहासाठी त्यांना कुठेतरी दुसरा कामधंदा बघावा लागतो.

मध्य प्रदेशसह इतर बऱ्याच राज्यातील होमगार्डस् शासनाकडे नियमित झालेले आहेत. त्यांना मानधनाऐवजी वेतन देण्यात येते. मात्र महाराष्ट्रात त्यांच्यावर होत असलेला अन्याय दूर व्हावा या मागणीसाठी त्यांनी बहिष्काराचे अस्त्र उगारले आहे. होमगार्डसच्या या बहिष्कारामुळे येणाऱ्या सणासुदींच्या दिवसात पोलिसांवर मात्र ताण येणार आहे.