लॅन्डरची छायाचित्रे १२ दिवसांनी!

म.टा. प्रतिनिधी, नागपूर

इस्रोच्या चांद्रयान मोहिमेचा प्रवास शंभर टक्के यशापासून अगदी दोन किलोमीटरआधीच संपला. तरीसुद्धा या मोहिमेतील ९० टक्के उद्दिष्ट साध्य झाल्याचा दावा इस्रोतर्फे केला जात आहे. विक्रम लॅन्डरचा संपर्क तुटल्याने त्याची नेमकी परिस्थिती अद्याप समजू शकलेली नाही. मात्र, १० ते १२ दिवसांच्या कालावधीत त्याची चंद्रावरील छायाचित्रे मिळण्याची शक्यता आहे. त्यावरून लॅन्डरची परिस्थिती नेमकी कशी आहे, हे लक्षात येईल', अशी माहिती कमिन्स कॉलेज ऑफ इंजिनीअरिंगचे प्राचार्य डॉ. भूषण जोशी यांनी दिली.

चांद्रयान या मोहिमेच्या निमित्ताने रामण विज्ञान केंद्रात जोशी यांच्या व्याख्यानाचे आयोजन करण्यात आले होते. त्यावेळी ते बोलत होते. यावेळी त्यांनी शालेय विद्यार्थ्यांना चांद्रयानाबाबत माहिती दिली. ते म्हणाले, 'चांद्रयानाचे सॉफ्ट लॅण्डिंग थोड्याने हुकले. मात्र, पुढील काही दिवसांत त्याची नेमकी परिस्थिती दिसण्याची शक्यता आहे. विक्रम लॅन्डर ऑर्बिटरपासून दोन दिवसांपूर्वीच वेगळे झाले. हे ऑर्बिटर किमान वर्षभर कार्यरत राहू शकते. या ऑर्बिटरला चंद्राभोवती प्रदक्षिणा पूर्ण करण्यास सुमारे १४ दिवस लागतात. त्यामुळे ज्या ठिकाणी हे लॅन्डर ऑर्बिटरपासून वेगळे झाले त्या ठिकाणी येण्यास या ऑर्बिटरला किमान १२ दिवस लागण्याची शक्यता आहे. त्याठिकाणी आल्यावर तेथील छायाचित्रे मिळू शकतात. त्यावरून लॅन्डरची स्थिती लक्षात येऊ शकते.'

याखेरीज विद्यार्थ्यांसाठी प्रश्नमंजुषेचेही आयोजन करण्यात आले होते. ४ सप्टेंबरपासून सुरू झालेल्या या प्रश्नमंजुषेत शहरातील ४० शाळांमधील विद्यार्थ्यांनी सहभाग घेतला होता. शनिवारी प्रश्नमंजुषेची अंतिम फेरी झाली. यावेळी विजेत्यांना बक्षीस वितरण करण्यात आले.

विद्यार्थ्यांनी बघितले 'विक्रम'

शालेय विद्यार्थ्यांना या मोहिमेबाबत अधिक उत्सुकता आहे. त्यामुळे रामण केंद्रातर्फे या रोव्हरची एक छोटेखानी प्रतिकृती तयार करण्यात आली होती. मुलांना रोव्हरची सखोल माहिती मिळावी आणि हे रोव्हर नेमके कसे असते, याची प्रत्यक्ष कल्पना यावी, या उद्देशाने हा उपक्रम राबविण्यात आला.