म. टा. प्रतिनिधी, नागपूर
लहान मुले खेळताना दुर्लक्ष करू नका, त्यांच्यावर सतत लक्ष ठेवा. दुर्लक्ष होण्यामुळेच जीवावर बेतल्याची धक्कादायक घटना एमआयडीसीतील अमरनगर भागात उघडकीस आली. आजोबा व आई-वडिलांचे दुर्लक्ष झाल्याने दोन वर्षीय चिमुकल्याचा नाल्यात पडून मृत्यू झाला. ही हृदयद्रावक घटना रविवारी सायंकाळी घडली. अंशू सोहनलाल खुद्दार, असे मृताचे नाव आहे.
पोलिसांनी दिलेल्या माहितीनुसार, रविवारी सायंकाळी अंशू हा त्याच्या आजोबांसोबत घराबाहेर खेळत होता. सायंकाळी त्याच्या आजोबाला बाजारात जायचे होते. त्यामुळे त्यांनी अंशूला घरात सोडले व बाजारात गेले. याचदरम्यान अंशू घराबाहेर आला. खेळता- खेळता तो नाल्यात पडला. आवाजाने त्याची आई घराबाहेर आली. अंशू नाल्यात पडल्याचे बघताच त्याच्या आईने हंबरडा फोडला. शेजारी धावले. नाल्यातून बाहेर काढून अंशूला लता मंगेशकर हॉस्पिटलमध्ये दाखल केले. डॉक्टरांनी तपासून अंशूला मृत घोषित केले. याप्रकरणी एमआयडीसी पोलिसांनी आकस्मिक मृत्यूची नोंद केली आहे. अंशूची आई गृहिणी आहे. अंशूचे वडील सोहनलाल हे वानाडोंगरी नगरपरिषदेत चतुर्थश्रेणी कर्मचारी आहेत.
क्षणात विझला वंशाचा दिवा
अंशूला आजोबांनी घरात सोडले. आई त्याच्याकडे लक्ष देईल, असा आजोबांचा समज झाला. अंशू आजोबांकडे असल्याचा समज अंशूच्या आईचा झाला. दोघांच्या गैरसमजुतीतून अनर्थ घडला. 'वंशाचा दिवा' क्षणात विझला. अंशूच्या मृत्यूने त्याची आई धायमोकलून रडत आहे. खुद्दार कुटुंबावर दु:खाचा डोंगर कोसळल्याने परिसरात शोककळा पसरली आहे.
........