म. टा. प्रतिनिधी, नागपूर
सतरंजीपुरा येथील ज्या करोनाबाधिताचा अहवाल सोमवारी सकारात्मक आला, त्या रुग्णाचा मृतदेह दफनविधीसाठी नातेवाईकांच्या सुपूर्द करण्यात आला. हा रुग्ण ज्यावेळी शनिवारी इंदिरा गांधी शासकीय वैद्यकीय महाविद्यालय व रुग्णालयात उपचाराला आला, त्यावेळी त्याला हगवण लागल्याचे सांगण्यात आले होते. त्यामुळे मेयोतील अपघात विभागातील पाच डॉक्टर आणि परिचारिकांनी त्याच्यावर प्राथमिक उपचार केले. त्यामुळे या रुग्णाच्या संपर्कात आलेले मेयोतील पाच डॉक्टर, पाच परिचारिका आणि पाच चतुर्थश्रेणी कर्मचाऱ्यांचे मंगळवारी तातडीने विलगीकरण करण्यात आले.
या सर्वांच्या घशातील स्त्रावाची प्राथमिकतेने तडकाफडकी तपासणी करण्यात आली. त्यापैकी ५ डॉक्टर आणि ५ परिचारिकांसह आणखी दोघांचे अहवाल नकारात्मक आले. मात्र, त्यांचा अहवाल नकारात्मक आला असला तरी पुढचे १४ दिवस त्यांच्यात पुन्हा करोनाची लक्षणे दिसण्याची जोखीम पाहाता, या सर्वांना तातडीने विलगीकरण कक्षात दाखल करण्यात आले.
मेयोचे सर्जिकल कॉम्प्लेक्स करोनाबाधितांसाठी
करोनाचे वाढते संशयित लक्षात घेता इंदिरा गांधी शासकीय वैद्यकीय महाविद्यालयातील संपूर्ण सर्जिकल कॉम्लेक्स करोनाबाधित आणि संशयितांसाठी आरक्षित करण्यात आले आहे. येथील ६०० खाटांपैकी १२० खाटा व्हेंटिलेटर्ससाठी, तर ४० खाटा एचडीयू (हाय डिपेंडन्सी युनिट) साठी राखीव ठेवण्यात आल्या आहेत. उर्वरित सर्व खाटा आयसोलेशन वॉर्डासाठी आरक्षित ठेवण्यात आल्या आहेत.
दैनिक संशयित : ८५
एकूण संशयित : ११२१
सध्या भरती संशयित : ८०
एकूण भरती संशयित : २३
दैनिक तपासणी नमुने : २९
एकूण तपासणी नमुने : ९९०
आतापर्यंत पॉझिटिव्ह नमुने : १९
घरी सोडलेले सकारात्मक रुग्ण : ०४
घरी सोडलेले संशयित : ७५१
आज अलगीकरण केलेले संशयित : ६३
अलगीकरण कक्षात भरती एकूण संशयित : ५३४
अलगीकरणातून घरी पाठविलेले संशयित : ४०
अलगीकरणातून मेयो-मेडिकलला पाठविलेले संशयित : ८
पाठपुरावा सुरू असलेले एकूण संशयित : १,२१६