सुनील देशमुखांचे निर्देश; 'गोसेखुर्द'च्या भूसंपादनांचा आढावा
म.टा. प्रतिनिधी, नागपूर
गोसेखुर्द प्रकल्पातून शेतकऱ्यांना थेट सिंचनाच्या सुविधा उपलब्ध करून देण्यासाठी जिल्हास्तरीय समितीने ठरवून दिलेल्या दराप्रमाणे तत्काळ खरेदीला सुरुवात करा. तसेच शेतकऱ्यांना विश्वासात घेवून आवश्यक असलेली जमीन कालबद्ध कार्यक्रमानुसार अधिग्रहित करण्याच्या सूचना विदर्भ पाटबंधारे विकास महामंडळाचे उपाध्यक्ष आमदार डॉ. सुनील देशमुख यांनी दिल्या.
विभागीय आयुक्त कार्यालयाच्या सभागृहात गोसेखुर्द प्रकल्पातील भूसंपादनामुळे प्रलंबित असलेल्या कामांचा आढावा विदर्भ पाटबंधारे विकास महामंडळाचे उपाध्यक्ष डॉ. देशमुख व विभागीय आयुक्त अश्विन मुदगल यांनी घेतला. यावेळी जिल्हाधिकारी (भंडारा) शंतनू गोयल, कुणाल खेमनार (चंद्रपूर), विदर्भ पाटबंधारे विकास महामंडळाचे मुख्य अभियंता अ. रा. कांबळे, अधीक्षक अभियंता जी. एम. शेख, वन जमाबंदी अधिकारी एस. एच. टोणगांवकर, उपायुक्त श्रीकांत फडके, उप जिल्हाधिकारी अविनाध कातडे तसेच जलसंपदा विभागाचे सर्व कार्यकारी अभियंता व महसूल विभागाचे भूसंपादन अधिकारी उपस्थित होते.
गोसेखुर्द प्रकल्पासाठी आवश्यक असलेल्या भूसंपादनासंदर्भात जिल्हानिहाय कालबद्ध कार्यक्रम तयार करण्यात आला. जिल्हाधिकारी यांनी त्यानुसार भूसंपादनाची कार्यवाही पूर्ण करावी. तसेच दर महिन्याला सर्व यंत्रणांकडून आढावा घ्यावा, अशी सूचना मुद्गल यांनी केली. मुख्यमंत्री देवेंद्र फडणवीस व केंद्रीय मंत्री नितीन गडकरी यांनी भूसंपादनाची संपूर्ण प्रक्रिया येत्या तीन महिन्यांत पूर्ण करण्याचे निर्देश दिले आहेत. त्यानुसार आवश्यक असलेली जमीन थेट खरेदी करावी, असेही ते म्हणाले.
बैठकीतील महत्त्वाचे मुद्दे
-स्थानिक स्तरावर तहसिलदार यांच्या अध्यक्षतेखाली जलसंपदा विभागाने विशेष्ठ बैठकी घ्या.
-जिल्हा स्तरावरील समितीने थेट खरेदीसाठी दर निश्चित करून दिले आहे.
- महसूल व जलसंपदा विभागाने समन्वय ठेवून नियमित आढावा घ्यावा.
- वन जमिनीच्या संदर्भातही प्रकरणे संबंधित विभागासोबत समन्वयाने निकाली काढा.
-नागपूर जिल्ह्यात गोसेखुर्द प्रकल्पासाठी आवश्यक असलेली १३ हजार १३९ हेक्टर जमीन अधिग्रहित करण्यात आली असून ९.७० हेक्टर जमीन अधिग्रहणाची प्रक्रिया सुरू आहे.
-भूसंपादन प्रकरणामध्ये ३६७ कोटी रुपयांचे वाटप करण्यात आले.