उद्यानांत भरदिवसा जुगाराचे गुत्ते! हटकले की मिळतात धमक्या, असामाजिक तत्त्वांमुळे नागपूरकर त्रस्त

नागपूर : वेळ दुपारी एक वाजताची…. उन्हामुळे रस्त्यांसह बगिच्यातील गर्दीही काहीशी कमी झालेली. याचाच फायदा घेऊन काही युवक रामदासपेठ परिसरातील लेंड्रा पार्कमध्ये आले. नागरिकांना फिरण्यासाठी इथे वॉकिंग ट्रॅक तयार करण्यात आला आहे. झाडांची सावली बघून या ट्रॅकवर सहा ते सात युवक बसले आणि सुरू झाला जुगार. सुमारे तीन तास हा गुत्ता सुरू होता. परिसरातील नागरिकांनाही हे चित्र दिसत होते. मात्र, त्यांना थांबविण्याची हिंमत कुणाचीच झाली नाही. हा सर्व प्रकार ‘मटा’च्या कॅमेऱ्यात कैद झाला. हे केवळ शहरातील एकाच उद्यानातील चित्र नव्हे. वेगवेगळ्या बगिच्यांत असाच असामाजिक तत्त्वांचा वावर वाढत आहे. सर्वसामान्यांसाठी ही डोकेदुखी ठरत आहे.

शहरातील वाढती गुन्हेगारी चिंतेचा विषय झाली असताना गुन्ह्यांचे मूळ कारण शोधून त्यांना प्रतिबंध घालण्याची गरज व्यक्त होऊ लागली आहे. शहरातील वेगवेगळ्या उद्यानांमध्ये जुगार आणि मद्यपानाचे सर्रास प्रकार चालतात. या लोकांना रोखण्याचा प्रयत्न केल्यास त्यांच्याकडून धमक्या मिळतात, त्यामुळे शांत बसलेले बरे, अशी प्रतिक्रिया काही नागरिकांनी नाव न प्रसिद्ध करण्याच्या अटीवर व्यक्त केली. उच्चभ्रू व्यक्तींचा परिसर म्हणून रामदासपेठची ओळख आहे. कुणाचीही भीती न बाळगता येथे भरदिवसा चालणाऱ्या जुगारामुळे पोलिस प्रशासनाच्या कार्यपद्धतीवरही नागरिकांनी प्रश्नचिन्ह उपस्थित केले.

हा गंभीर गुन्हा...

जुगार अॅक्टच्या कलम १२नुसार पैशांचा वापर करून सार्वजनिक ठिकाणी जुगार खेळणे हा गुन्हा आहे. दोषींवर गुन्हा दाखल होऊन त्यांना सहा महिन्यांचा कारावासही होऊ शकतो. हा दखलपात्र गुन्हा आहे, असे माजी पोलिस उपायुक्त डॉ. पुरुषोत्तम चौधरी यांनी सांगितले. मद्यपान करणे, मैदानात कचरा टाकण्याची विकृती वाढत असून नागरिकांनी सामाजिक भान जपण्याची गरजही त्यांनी व्यक्त केली.

तक्रारीसाठी पुढे या!

सार्वजनिक ठिकाणी असामाजिक तत्त्वांचा वावर वाढला आहे. नागरिकांना हे प्रकार दिसतात. मात्र, कुणी तक्रार करायला पुढे येत नाही. पोलिसांनी पेट्रोलिंग वाढविण्याची गरज आहे. बगिच्यात येणाऱ्या महिला आणि लहान मुलांसाठीही हे धोक्याचे आहे. नागरिकांची सुरक्षा जपण्यासाठी असे प्रकार रोखायला हवेत. जुगारामुळे मोठे गुन्हे करण्यासाठी ते प्रवृत्त होतात, त्यामुळे त्यांच्यावर प्रतिबंधात्मक कारवाई करण्याची गरज आहे, असे निवृत्त पोलिस उपअधीक्षक रमेश मेहता म्हणाले.

जुगारात मोबाईल हरला, मित्राच्या मदतीने फोन सोडला; लॉक उघडताच घृणास्पद कृत्य समोर
इथेही चालतात मद्यपार्ट्या

शहरातील वेगवेगळ्या बगिच्यांत लहान मुले खेळायला येतात. ज्येष्ठांचा विहार नियमित येथे असतो. योगाचे वर्गही चालतात. समाजाला बळकट करणारे उपक्रम एकीकडे चालणाऱ्या याच बगिच्यात सायंकाळ झाली की मद्यपार्ट्या रंगत असल्याचे धक्कादायक वास्तव आहे. इथे दारूच्या बाटल्या, पाण्याचे ग्लास आणि चिवड्याची पाकिटे असा कचरा पडलेला असतो. मद्यपींच्या पार्ट्या रंगत असल्याने सामाजिक स्वास्थ्य बिघडत चालले असल्याचा रोष परिसरातील नागरिक व्यक्त करतात. अंबाझरी तलावाच्या परिसरातही उघड्यावरच मद्यपार्ट्या रंगतात. सहज फिरायला गेले तरीही येथे दारूच्या बाटल्यांचा खच आढळून येईल.