टीम मटा
अनुसूचित जाती, अनुसूचित जमाती प्रतिबंधक कायद्यासंदर्भात सर्वोच्च न्यायालयाने दिलेल्या निर्णयाविरोधात सोमवारी भारत बंदचे आवाहन करण्यात आले होते. त्याला विदर्भात संमिश्र प्रतिसाद मिळाला. अमरावतीत भीम आर्मी संघटना व आंबेडकरी संघटनांनी मोर्चा काढला. भंडारा, ब्रम्हपुरीत व्यापाऱ्यांनी दुकाने बंद ठेवून समर्थन दिले. तर यवतमाळात जिल्हाधिकाऱ्यांना निवेदन देत आपल्या मागण्या मांडण्यात आल्या. बंदच्या पार्श्वभूमीवर पोलिसांनी चोख बंदोबस्त ठेवला होता.
अमरावती : सोमवारी भीम आर्मी संघटना व आंबेडकरी विचारांच्या संघटनांनी निळ्या झेंड्याखाली एकत्र येऊन मोर्चा काढला. मोर्चा व अमरावती बंदच्या पार्श्वभूमीवर शहरात पोलिसांचा तगडा बंदोबस्त तैनात करण्यात आला होता. अॅट्रॉसिटी कायद्यात बदलाबाबत सर्वोच्च न्यायालयाच्या निर्णयाचे पडसाद सोमवारी संपूर्ण देशभरात उमटले. भीम आर्मी व अन्य समविचारी संघटनांनी अमरावती बंदचे आवाहन केले होते. परंतु व्यवहार काही प्रमाणात सुरळीत सुरू असल्याचे दिसले. इर्वीन चौकातील डॉ. बाबासाहेब आंबेडकर यांच्या पुतळा परिसरातून मोर्चा काढण्यात आला. मोर्चामध्ये मोठ्या संख्येने भीम आर्मी संघटनेचे कार्यकर्ते सहभागी झाले होते. शेकडो कार्यकर्त्यांचा हा मोर्चा दुपारी जिल्हाधिकारी कार्यालयावर धडकला. आंदोलकांनी जिल्हाधिकारी अभिजित बांगर यांची भेट घेऊन त्यांना निवेदन दिले. अॅट्रॉसिटी कायद्यातील सुधारणेसाठी सर्वोच्च न्यायालयाने पुर्नविचार करावा, अशी मागणी करण्यात आली.
पोलिसांचा चोख बंदोबस्त
भीम आर्मीने पुकारलेल्या मोर्चाच्या पार्श्वभूमीवर शहरात महत्त्वपूर्ण ठिकाणी पोलिसांचा बंदोबस्त लावण्यात आला होता. शहरातील सर्वच चौक व मुख्य रस्त्यावर पोलिसांचा तगडा बंदोबस्त होता. जिल्हाधिकारी कार्यालयावरदेखील पोलिसांचा मोठा ताफा तैनात होता.
भंडारा बंदला संमिश्र प्रतिसाद
भंडारा : मागासवर्गीयांच्या संरक्षणासाठी असलेला अॅट्रॉसिटी कायदा निष्क्रिय केल्यामुळे सरकारने सर्वोच्च न्यायालयात पुनर्विचार याचिका त्वरित दाखल करावी. तसेच एससी, एसटी, एनटी व ओबीसी आदींच्या आरक्षणाच्या समर्थनार्थ सोमवारी जिल्ह्यातील विविध सामाजिक, सांस्कृतिक, राजकीय संघटना, भीम आर्मी व भारत एकता मिशनच्यावतीने भंडारा बंदचे आवाहन करण्यात आले होते. या बंदला संमिश्र प्रतिसाद मिळाला. भारत बंदला पाठिंबा देण्यासाठी संघटनेच्यावतीने जिल्हाधिकाऱ्यांमार्फत मुख्यमंत्री व राष्ट्रÑपतींना निवेदन सादर करण्यात आले. सदर निवेदनाच्या प्रती पंतप्रधान व सामाजिक न्यायमंत्र्यांनाही पाठविण्यात आल्या. संघटनेच्यावतीने सकाळी पुकारण्यात आलेल्या भारत बंदच्या निमित्ताने शास्त्री चौक ते त्रिमूर्ती चौकातील डॉ. बाबासाहेबांच्या पुतळ्यापर्यंत दुचाकी रॅली काढण्यात आली. काही व्यापाऱ्यांनी आपली प्रतिष्ठाने बंद तर काही सुरू होती. त्याचप्रमाणे शाळा, महाविद्यालये, शासकीय व निमशासकीय कार्यालय सुरू होते. मात्र, सकाळच्या वेळेमध्ये भंडारा आगारातून बाहेरगावी जाणाऱ्या बसफेऱ्या बंद असल्याने प्रवाशांना त्रास सहन करावा लागला. मात्र, दुपारनंतर बसफेऱ्या पूर्ववत सुरू झाल्या. बंददरम्यान पोलिसांचा चोख बंदोबस्त असल्याने शहरात कुठेही अनुचित प्रकार न घडता शहरात शांतता होती. एकंदरीत आजच्या पुकारण्यात आलेल्या बंदला शहरात संमिश्र प्रतिसाद मिळाला.
ब्रम्हपुरीत बंदला व्यापाऱ्यांचे समर्थन
चंद्रपूर : अखिल भारतीय अनुसूचित जाती जमाती संघटनेच्यावतीने पुकारण्यात आलेल्या भारत बंदला ब्रम्हपुरीतील व्यापारी संघटनांनी समर्थन देत प्रतिष्ठाने बंद ठेवली. बॅरि. राजाभाऊ खोब्रागडे चौकातून रॅलीद्वारे सम्राट अशोक चौक, बाजार चौक, सावरकर चौक, शिवाजी चौक सा मार्गक्रमण करीत उपविभागीय कार्यालयावर धडकला. अधिकाऱ्यांमार्फत राष्ट्रपतींना मागण्यांचे निवेदन सादर करण्यात आले.
बसपचे पंतप्रधानांना निवेदन
यवतमाळ : अनुसूचित जाती, जमाती अंतर्गत कायद्यात सर्वोच्च न्यायालयाच्या निर्णयाने शिथिलता आली आहे. त्यामुळे या समाजात भीतीचे वातावरण असून त्याबाबत पुनर्विचार करण्यात यावा यासाठी बहुजन समाज पार्टीच्यावतीने पंतप्रधानांना निवेदन पाठविण्यात आले. बसपचे जिल्हाध्यक्ष मो. तारिक साहिर लोखंडवाला यांनी जिल्हाधिकाऱ्यांना हे निवेदन दिले. यावेळी बसपचे कार्यकर्ते मोठ्या संख्येने हजर होते.